అవినీతి ఆరోపణలు.. బాబుకు సన్నిహితుడైన ఐఆర్‌ఎస్‌ ఆఫీసర్‌పై వేటు

అమరావతి: ఐఆర్‌ఎస్‌ అధికారి జాస్తి కృష్ణ కిశోర్‌‌ను జగన్ సర్కారు విధుల నుంచి సస్పెండ్ చేసింది. టీడీపీ ప్రభుత్వం హయాంలో ఆయన ఏపీ ఆర్థిక అభివృద్ధి మండలి సీఈవోగా పనిచేశారు. ఆయనపై అవినీతి ఆరోపణలు రావడంతో సస్పెండ్‌ చేస్తున్నట్లు వైఎస్సార్సీపీ ప్రభుత్వం ప్రకటించింది. పరిశ్రమలు, మౌలిక వసతులశాఖ నుంచి నివేదిక తెప్పించుకున్న ప్రభుత్వం.. ఆయన హయాంలో జరిగిన అక్రమాలపై విచారణ చేపట్టాలని సీఐడీ, ఏసీబీ డీజీలను ఆదేశించింది. ఆరు నెలల్లోగా విచారణ పూర్తి చేయాలని డెడ్ లైన్ విధించింది. విచారణ పూర్తయ్యే వరకు కృష్ణ కిశోర్‌ అమరావతి విడిచి వెళ్లొద్దని ఆదేశించింది. అవినీతి ఆరోపణలో శ్రీనివాస్ రెడ్డి అనే మరో అధికారిని కూడా జగన్ సర్కారు సస్పెండ్ చేసింది.

ఏపీ ఎకనమిక్ డెవలప్‌మెంట్ బోర్డు (ఏపీఈడీబీ)కు సీఎం చైర్మన్‌గా వ్యవహరిస్తారు. మూడేళ్ల పదవీ కాలానికి గతంలో చంద్రబాబు ఆయన్ను ఆర్థిక అభివృద్ధి మండలి సీఈవోగా నియమించారు. 1990 బ్యాచ్‌కు చెందిన కృష్ణ కిశోర్.. అంతకు ముందు పౌర విమానయాన శాఖ మంత్రి అశోక గజపతి రాజు వద్ద సెక్రటరీగా పని చేశారు. చార్టర్డ్ అకౌంటెంట్ అయిన కృష్ణ కిశోర్.. ఐఆర్ఎస్ కావడానికి ముందు హైదరాబాద్‌లోని ఓ సంస్థలో పని చేశారు.

సచివాలయంలో సస్పెండ్ అయిన ఇద్దరు సాధారణ పరిపాలన శాఖ అధికారులకు జగన్ సర్కారు తిరిగి పోస్టింగ్ ఇచ్చింది. జీఏడీ అసిస్టెంట్ సెక్రటరీ జయరాం, సెక్షన్ ఆఫీసర్ అచ్చయ్యలకు ప్రభుత్వం పోస్టింగ్ ఇచ్చింది. ఐఆర్ఎస్ అధికారి వెంకయ్య చౌదరి బదిలీ విషయంలో నిర్లక్ష్యంగా వ్యవహరించారనే ఆరోపణలపై ప్రభుత్వం వీరిని సస్పెండ్ చేసింది. పని ఒత్తిడి వల్ల తప్పు జరిగిందని భవిష్యత్తులో పొరపాటు జరగకుండా జాగ్రత్తపడతామని వీరిద్దరూ ప్రభుత్వానికి వివరణ ఇచ్చారు.