ఆ ఉద్యోగాలను వెంటనే భర్తీ చేయండి.. సీఎం జగన్ కీలక ఆదేశాలు

రాష్ట్ర స్త్రీ శిశు సంక్షేమ శాఖలో ఖాళీగా ఉన్న పోస్టుల భర్తీతో పాటు, పదోన్నతుల ప్రక్రియను వీలైనంత త్వరగా పూర్తిచేయాలని ముఖ్యమంత్రి వైఎస్ జగన్మోహన్ రెడ్డి ఆదేశాలు జారీ చేశారు. అలాగే, 63 సీడీపీఓ పోస్టుల భర్తీకి సీఎం జగన్ గ్రీన్‌ సిగ్నల్‌ ఇచ్చారు. వీటిని వీలైనంత త్వరగా భర్తీ చేయాలని ఆదేశించారు. మహిళా, శిశు సంక్షేమ శాఖపై తాడేపల్లిలోని తన క్యాంప్‌ కార్యాలయంలో ముఖ్యమంత్రి జగన్మోహన్‌రెడ్డి మంగళవారం సమీక్ష నిర్వహించారు.

అంగన్‌వాడీల్లో నాడు-నేడుపై ప్రభుత్వం దాదాపు రూ.1500 కోట్లకు పైగా ఖర్చు చేస్తోందని.. మూడు విడతల్లో చేపట్టాలని సీఎం జగన్ ఆదేశించారు. పనుల్లో నాణ్యత ఉండాలని, చిన్నారులకు మంచి వాతావరణం అందించాలన్నారు. ప్రతి మండలంలో పనులు జరిగేలా మూడు విడతలకూ కార్యాచరణ చేయాలని సీఎం పేర్కొన్నారు.

అలాగే, అంగన్‌వాడీల్లో నిరంతరం పర్యవేక్షణ ఉండాలని.. పాలు, గుడ్లు వంటి ఆహారం పంపిణీలో ఎలాంటి సమస్యలు ఉండకూడదని సీఎం జగన్ పేర్కొన్నారు. వీటి పంపిణీపై సమగ్ర పర్యవేక్షణ, పరిశీలన ఉండాలన్నారు. పంపిణీలో ఎక్కడైనా లోపాలు ఉంటే కచ్చితంగా సంబంధిత వ్యక్తులను బాధ్యులు చేసి చర్యలు తీసుకోవాలని ఆదేశించారు. అంగన్వాడీ సూపర్‌వైజర్లపైన కూడా పర్యవేక్షణ ఉండాలని సీఎం జగన్‌ పేర్కొన్నారు.