సీఏఏ, ఎన్ఆర్‌సీకి మద్దతిచ్చేది లేదు.. అభద్రతలో ముస్లింలు.. మంత్రి సంచలన వ్యాఖ్యలు

కేంద్ర ప్రభుత్వం తీసుకొచ్చిన పౌర సవరణ చట్టం (సీఏఏ), జాతీయ పౌర పట్టిక (ఎన్‌ఆర్‌సీ) బిల్లులకు వైఎస్సార్‌ కాంగ్రెస్ పార్టీ ప్రభుత్వం పూర్తి వ్యతిరేకని డిప్యూటీ సీఎం అంజాద్‌ బాషా పునరుద్ఘాటించారు. శనివారం అనంతపురం జిల్లాలోని ఉరవకొండలో జరిగిన మైనార్టీ సదస్సులో ఆయన పాల్గొన్నారు. ఈ సందర్భంగా మంత్రి అంజాద్ బాషా మాట్లాడారు.

దేశాన్ని మత ప్రాతిపదికన విభజిస్తున్నారని.. తమ పౌరసత్వానికే ముప్పు ఉందని ముస్లింలు అభద్రతా భావంతో ఉన్నారని మంత్రి అంజాద్ బాషా వ్యాఖ్యానించారు. అందుకే కేంద్రం తీసుకొచ్చిన సీఏఏ, ఎన్ఆర్‌సీ బిల్లులను వ్యతిరేకిస్తున్నట్లు మంత్రి వెల్లడించారు. ముస్లింలకు అన్ని వేళలా ముఖ్యమంత్రి వైఎస్‌ జగన్‌మోహన్‌రెడ్డి అండగా ఉంటారని చెప్పారు.

అమరావతిలో మాజీ ముఖ్యమంత్రి చంద్రబాబునాయుడు నిర్మించింది కేవలం తాత్కాలిక రాజధాని మాత్రమే అని స్పష్టం చేశారు. ఏపీలోని అన్ని జిల్లాల అభివృద్ధి కోసం సీఎం వైఎస్ జగన్ అధికార వికేంద్రీకరణ చేస్తున్నారని వివరించారు. సీఎం జగన్‌ చేపడుతున్న సంక్షేమ పథకాలతో చంద్రబాబు బెంబేలెత్తిపోతున్నారని అంజాద్‌ బాషా పేర్కొన్నారు.