నారా ఫ్యామిలీ బినామీ ఆస్తులను కూడా ప్రకటించాలి: గడికోట శ్రీకాంత్ రెడ్డి

టీడీపీ అధినేత చంద్రబాబు కుటుంబ సభ్యుల ఆస్తులను ఆయన కుమారుడు నారా లోకేశ్ ప్రకటించిన సంగతి తెలిసిందే. ఈ సందర్భంగా లోకేశ్ మాట్లాడుతూ.. తమను విమర్శించడం కాదు.. వైఎస్ఆర్సీపీ నేతలు కూడా తమ ఆస్తులను ప్రకటించారని సవాల్ విసిరారు. లోకేశ్ ఆస్తులను ప్రకటించిన కాసేపటికే వైఎస్సార్సీపీ దాడి మొదలుపెట్టింది. చంద్రబాబు అవినీతికి బ్రాండ్ అంబాసిడర్ అని చీఫ్ విప్ గడికోట శ్రీకాంత్ రెడ్డి విమర్శించారు.

గురువారం తాడేపల్లిలోని వైఎస్సార్సీపీ ఆఫీసులో.. మీడియాతో మాట్లాడిన గడికోట శ్రీకాంత్ రెడ్డి.. హడావుడిగా లోకేశ్ ఆస్తులను ప్రకటించడం పట్ల అనుమానం వ్యక్తం చేశారు. ఐటీ విచారణలో వాస్తవాలు బయటకు వస్తున్నాయనే కారణంతో ఆస్తులు ప్రకటించారని విమర్శించారు.

అహ్మద్ పటేల్‌కు కూడా డబ్బులు పంపించారని వార్తలొస్తున్న తరుణంలో లోకేశ్ తమ కుటుంబ సభ్యుల ఆస్తులను ప్రకటించారని శ్రీకాంత్ రెడ్డి గుర్తు చేశారు. నారా ఫ్యామిలీకి ఉన్న బినామీ ఆస్తులను కూడా ప్రకటిస్తే అప్పుడు నిజం తెలుస్తుందని ఆయన లోకేశ్‌ను ఉద్దేశించి వ్యాఖ్యానించారు. బాబు అవినీతి బాగోతం దేశం మొత్తానికి తెలిసిపోయిందన్నారు.

చంద్రబాబు పీఎస్‌ ఇంట్లోనే దాడులు చేస్తే.. రూ.2వేల కోట్ల అక్రమ లావాదేవీలు బయటపడ్డాయన్న గడికోట శ్రీకాంత్ రెడ్డి.. బాబు రూ.7 లక్షల కోట్ల అవినీతికి పాల్పడ్డారని ఆరోపించారు. విదేశాల్లో ఉన్న ఆయన బినామీ ఆస్తులను బయటపెట్టాలని డిమాండ్‌ చేశారు.