ప్రియమైన చంద్రబాబుకి.. ఆప్తుడైన మోహన్ బాబు స్ట్రాంగ్ కౌంటర్, ఊహించని రీతిలో..

టీడీపీ అధినేత చంద్రబాబు నాయుడిపై వైఎస్ఆర్సీపీ నేత, నటుడు మోహన్ బాబు ఘాటైన వ్యాఖ్యలు చేశారు. ఇటీవల విజయవాడలో జరిగిన పార్టీ సమీక్షా సమావేశంలో చంద్రబాబు మాట్లాడుతూ.. క్రమశిక్షణతో మెలగపోతే సహించేది లేదని పార్టీ నాయకులను హెచ్చరించారు. తనకు సన్నిహితుడైన మోహన్ బాబునే సస్పెండ్ చేశానని గుర్తు చేశారు. ఈ వ్యాఖ్యలకు కౌంటర్‌గా మోహన్ బాబు టీడీపీ అధినేతపై విమర్శలు గుప్పించారు.

క్రమశిక్షణ అనే పదానికి, స్నేహం అనే పదానికి అర్థం తెలియని వ్యక్తి ఈ దేశంలో ఎవరైనా ఉన్నారంటే అది చంద్రబాబు ఒక్కడేనంటూ మోహన్ బాబు ఘాటైన వ్యాఖ్యలు చేశారు. దయ చేసి ఏ సందర్భంలోనూ నా పేరుకు భంగం కలిగించేటట్టు ప్రస్తావించకు. అది నీకు నాకు మంచిదంటూ బాబుకు హితవు పలికారు. ఎక్కడైనా, ఎప్పుడైనా ఎదురు పడితే సరదాగా మాట్లాడుకుందాం, అదీ నీకు ఇష్టమైతే. ఉంటానంటూ ఆయన ట్వీట్ చేశారు.

‘‘చంద్రబాబు ఎలక్షన్స్ అయిపోయాయి, ఎవరు దారిన వాళ్ళు ఉన్నారు, ఎవరి పనులు వాళ్ళు చేసుకుంటున్నారు.అంతా ప్రశాంత వాతావరణం. ఈ సమయంలో మళ్ళీ ఇలా నా మనసును ఇబ్బంది పెడతావు అనుకోలేదు. రెండు రోజుల క్రితం క్రమశిక్షణ లేని వ్యక్తి మోహన్ బాబు అని నీ నోటి నుండి రావడం నాకు ఆశ్చర్యాన్ని కలిగించింద’’ని మోహన్ బాబు మరో ట్వీట్ చేశారు.
‘‘నా మనసును గాయపరిచావు. అన్న యన్. టి. ఆర్, అక్కినేని నాగేశ్వరరావు గారు మరియు నా సినిమా పరిశ్రమ క్రమశిక్షణ కలిగిన వ్యక్తి మోహన్ బాబు అని ఎన్నో సందర్భాల్లో చెప్పారు, చెప్తుంటారు. అది అందరికీ తెలిసిన విషయమే’’నని మోహన్ బాబు ఆవేదనతో ట్వీట్ చేశారు.

చంద్రబాబుపై మోహన్ బాబు గతంలోనూ విమర్శలు గుప్పించారు. ఎన్నికల ముందు మీడియాతో మాట్లాడిన మోహన్ బాబు.. తెలుగువారి ఆత్మగౌరవం పేరుతో మహానటుడు ఎన్టీఆర్ స్థాపించిన పార్టీని లాక్కున్న వ్యక్తి చంద్రబాబు నాయుడని ధ్వజమెత్తారు. ఎన్టీఆర్ చేతిలోంచి అన్యాయంగా అధికార పగ్గాలు లాక్కున్నారంటూ మోహన్ బాబు విమర్శించారు.

Read Also: అవంతి, జగన్ వాటిని మానేశారా? పవన్ సూటి ప్రశ్న