పెళ్లిలో కూలిన వేదిక.. వైసీపీ ఎమ్మెల్యేకు గాయాలు

పెళ్లి వేదిక కూలడంతో మంగళగిరి ఎమ్మెల్యే ఆళ్ల రామకృష్ణారెడ్డికి ప్రమాదం జరిగింది. గుంటూరు జిల్లా తాడేపల్లి ఉండవల్లిలో ఓ వివాహ వేడుకకు ఆర్కే హాజరయ్యారు. ఎమ్మెల్యే వేదికపై వధూవరులను ఆశీర్వదించే సమయంలో వేదిక ఒక్కసారిగా కూలిపోవడంతో.. ఆర్కే కిందపడ్డారు. వెంటనే అప్రమత్తమైన భద్రతా సిబ్బంది ఆయన్ను పైకి లేపారు. ఆళ్ల రామకృష్ణారెడ్డిని హుటా హుటిన ఆస్పత్రికి తరలించారు.. అక్కడ చికిత్స అందించారు. ఆయన కాలికి గాయమైనట్లు తెలుస్తోంది.

ఆస్పత్రిలో చికిత్స అనంతరం ఆళ్ల రామకృష్ణారెడ్డి తిరిగి ఇంటికి వెళ్లిపోయారు. ఈ ప్రమాదంలో ఆర్కే స్వల్ప గాయాలతో సురక్షితంగా బయటపడ్డారు. ఇటు ఈ ప్రమాదం గురించి తెలియగానే వైఎస్సార్‌సీపీ కార్యకర్తలు కంగారుపడ్డారు. ఎలాంటి ఇబ్బంది లేదని చెప్పడంతో ఊపిరి పీల్చుకున్నారు. ఆయన్ను పలువురు వైఎస్సార్‌సీపీ నేతలు, కార్యకర్తలు పరామర్శించారు.