'లోకేష్ కూసంత గుజ్జువాడు.. ఆ పేర్లు బయటపెట్టు'

ఏపీలో కరోనా రాజకీయం నడుస్తోంది. వైఎస్సార్‌సీపీ-టీడీపీల మధ్య ట్వీట్ యుద్ధం నడుస్తోంది. ఇరు పార్టీల నేతలు ఒకరిపై మరొకరు దుమ్మెత్తిపోసుకుంటున్నారు. తాజాగా నర్సీపట్నం డాక్టర్ వీడియోపై రగడ మొదలైంది. ఈ వీడియోను మాజీ మంత్రి నారా లోకేష్ ట్వీట్ చేశారు. ప్రాణాలను సైతం లెక్క చెయ్యకుండా కరోనా నియంత్రణకు ముందుండి పోరాడుతున్న డాక్టర్లు, వైద్య సిబ్బందికి ఇవ్వాల్సిన మాస్కులు, వ్యక్తిగత రక్షణ కిట్లను వైఎస్సార్‌సీపీ నాయకులు కొట్టేయడం దారుణం అన్నారు. జగన్ గారి పబ్లిసిటీకి, క్షేత్ర స్థాయిలోని కరోనా నివారణ చర్యలకు ఆకాశానికి, భూమికి మధ్య ఉన్నంత తేడా ఉంది అన్నారు.
లోకేష్ విమర్శలపై వైఎస్సార్‌సీపీ ఎమ్మెల్యే అంబటి రాంబాబు స్పందించారు. 'నారా లోకేష్.. ఏమయ్యా టీడీపీ సోషల్ మీడియా ఇంచార్జ్.. ప్రపంచంలో నడుస్తున్న పరిస్థితులు ఏంటి.. నువ్వు చేస్తున్న పచ్చ రాజకీయ ప్రచారం ఏంటి.. మీ నాన్న సీఎం అవ్వడం వలన మంత్రిగా చేసిన అనుభవం కూడా ఉందిగా.. కూసంత గుజ్జు వాడి ఆధారాలతో ఆ నాయకుల పేర్లు భయటపెట్టవచ్చుకదా' అంటూ సెటైర్లు పేల్చారు.