అమరావతికి డబ్బుల్లేవ్.. కుండబద్దలు కొట్టిన వైసీపీ ఎమ్మెల్యే.. ముగిసిన భేటీ

ఏపీకి మూడు రాజధానుల అంశంపై వైసీపీ సీనియర్ నేత, ఎమ్మెల్యే అంబటి రాంబాబు కీలక వ్యాఖ్యలు చేశారు. రాజధాని అంటే ఒక నగరమని.. అంతేకానీ కొత్త నగరాన్ని నిర్మించడం కాదంటూ సంచలన వ్యాఖ్యలు చేశారు. ఏపీ రాజధానిపై సీఎం వైఎస్ జగన్ ప్రకటన.. జీఎన్ రావు కమిటీ నివేదికపై అమరావతి ప్రాంత ఎమ్మెల్యేల సమావేశం అనంతరం ఆయన కీలక వ్యాఖ్యలు చేశారు. రాష్ట్ర ఆర్థిక పరిస్థితి బాగోలేదన్న అంబటి.. కొత్త రాజధాని నిర్మాణం సాధ్యమయ్యే పని కాదని అభిప్రాయపడ్డారు.

గత ముఖ్యమంత్రి చంద్రబాబు అమరావతి పేరుతో తాత్కాలిక సెటప్ ఏర్పాటు చేశారని అంబటి అన్నారు. అమరావతిలో కేవలం ఐదే వేల కోట్లు మాత్రమే ఖర్చు చేశారని.. రాజధాని నిర్మాణం పూర్తి కావాలంటే మరో లక్షా పది వేల కోట్లు అవసరమవుతాయన్నారు. ఏపీ ఆర్థిక పరిస్థితి.. లక్షా పది వేల కోట్లు ఖర్చు పెట్టే పరిస్థితిలో లేదన్నారు.

Also Read: అమరావతి రైతు ఆత్మహత్యా యత్నం.. పరిస్థితి ఉద్రిక్తం..

తక్కువ ఖర్చుతో రాష్ట్ర రాజధాని ఏర్పాటుకు జీఎన్ రావు కమిటీ సిఫార్సులను ఆమోదించినట్లు సంచలన ప్రకటన చేశారు. కమిటీ సిఫార్సులను అమలు చేయాలని రాష్ట్ర ప్రభుత్వం నిర్ణయించుకుందని అంబటి కుండబద్దలు కొట్టారు. లక్షా పది వేల కోట్లు ఒకే చోట ఖర్చు చేయడానికి ప్రభుత్వం సుముఖంగా లేదని ఆయన స్పష్టం చేశారు.

ఒక నగరంలోనే రాజధాని పెట్టాలి కానీ.. రాజధానిని నిర్మించడం సరైన విధానం కాదని అంబటి అభిప్రాయపడ్డారు. గత ప్రభుత్వం తాత్కాలిక రాజధాని కోసం భూములు సేకరించిందని.. ఇక్కడ రాజధాని వస్తుందన్న ఆశలు అడియాసలైన నేపథ్యంలో వారికి న్యాయం చేసేందుకు ప్రభుత్వం ప్రయత్నం చేస్తుందన్నారు. అమరావతిని పారిశ్రామికంగా లేదా ఐటీ, ఎడ్యుకేషన్ హబ్‌గా తీర్చిదిద్దే అవకాశాలను ప్రభుత్వం పరిశీలిస్తుందని ఆయన స్పష్టం చేశారు.

Read Also: ఆ రెండు కులాల పిచ్చి ఘర్షణ.. రాజధానిపై బైరెడ్డి సంచలన వ్యాఖ్యలు