‘దొంగనాటకాలొద్దు బాబూ.. కోడెలపై ప్రేమ ఉంటే ఆ పని చెయ్!’

ఏపీ మాజీ స్పీకర్ కోడెల శివప్రసాదరావుది ఆత్మహత్య కాదు ప్రభుత్వ హత్య అని చంద్రబాబు చేసిన వ్యాఖ్యలను వైఎస్సార్సీపీ ఎమ్మెల్యే అంబటి రాంబాబు ఖండించారు. మరీ ఇంత దిగజారుడు రాజకీయాలకు పాల్పడతారా? అంటూ మండిపడ్డారు. కోడెల మరణంపై సమగ్ర విచారణ జరగాలని, ప్రతి తెలుగువాడి ఇంట్లో చర్చ జరగాలన్నారు. ఆయన ఎందుకు చనిపోయారో ప్రజలకు తెలియాలన్నారు.

ప్రభుత్వం కేసులు పెట్టి వేధించిందని టీడీపీ చేస్తున్న ఆరోపణలను అంబటి తప్పుబట్టారు. తానుగానీ, నరసరావుపేట ఎమ్మెల్య గోపిరెడ్డి, సీఎం వైఎస్ జగన్ ఏమైనా కేసులు పెట్టారా? అని ప్రశ్నించారు. ఎన్నో పెద్ద కేసులు ఎదుర్కొన్న కోడెలకు ఈ చిన్న చిన్న కేసులు లెక్క కాదన్నారు. ఈ కేసులు ఆయనను నైతికంగా దెబ్బతీశాయని, అలాంటి సమయంలో కుటుంబ సభ్యులు కానీ, పార్టీ కానీ అండగా నిలవలేదన్నారు. అందుకే ఆత్మహత్య చేసుకునే పరిస్థితికి నెట్టివేయబడ్డారన్నారు.

Must Read:కోడెల ‘స్వర్గపురి’లోనే అంత్యక్రియలు.. కడసారి చూసేందుకు పోటెత్తిన జనం

పల్నాటి పులిగా పిలిపించుకున్న వ్యక్తిని ఆత్మహత్యకు నెట్టివేసిన కారణాలను అన్వేషించాలన్నారు. కోడెల మరణాన్ని ప్రభుత్వంపై రుద్దాలని చంద్రబాబు చూస్తున్నారని మండిపడ్డారు. సానుభూతి, రాజకీయ లబ్ధి కోసం బాబు పాకులాడుతున్నారని విమర్శించారు. కోడెల మృతికి ఆయన కుటుంబసభ్యులు, టీడీపీ తప్ప వైఎస్సార్సీపీ ఎంతమాత్రం కాదని ఆయన స్పష్టం చేశారు.

Also Read: చంద్రబాబు నిర్లక్ష్యం వల్లే కోడెల చనిపోయారు.. బీజేపీ నేత సంచలన వ్యాఖ్యలు

కోడెల శివప్రసాదరావు మరణాన్ని రాజకీయ లబ్ధికి ఉపయోగించుకునే నీచమైన ఎత్తుగడ వేశారని అంబటి తీవ్రవ్యాఖ్యలు చేశారు. చంద్రబాబుకి కోడెలపై నిజంగా ప్రేమాభిమానాలు ఉంటే ఆయన వారసులుగా కొడుకుని, కుమార్తెని ప్రకటించాలన్నారు. కొడుకు, కూతురిని నరసరావుపేట, సత్తెనపల్లి నుంచి పోటీ చేయిస్తానని ప్రకటించాలని డిమాండ్ చేశారు. అంతేకానీ దొంగనాటకాలు వద్దంటూ చంద్రబాబుపై మండిపడ్డారు.