'రెండు చోట్ల ఓడిన పవన్ గురించి నేనేం మాట్లాడను.. సారీ'

వైఎస్సార్‌‌సీపీ వర్సెస్ జనసేన.. ఏపీలో రాజకీయం మరింత వెడెక్కుతోంది. రాయలసీమ పర్యటనలో ఉన్న జనసేన అధినేత పవన్ కళ్యాణ్.. వైఎస్సార్‌సీపీ నేతల మధ్య మాటల యుద్ధం మరింత ముదురుతోంది. ఇంగ్లీష్ మీడియం, ఉల్లి ధరలు, మత మార్పిడిలు అంటూ పవన్ ప్రభుత్వాన్ని టార్గెట్ చేస్తే.. చంద్రబాబుకు పవన్ అమ్ముడుపోయారంటూ వైఎస్సార్‌సీపీ కౌంటరిస్తోంది.

పవన్ కళ్యాణ్ వ్యాఖ్యలపై చంద్రగిరి ఎమ్మెల్యే, తుడా ఛైర్మన్ చెవిరెడ్డి భాస్కర్‌రెడ్డి సెటైర్లు పేల్చారు. జనసేన అధినేత వ్యాఖ్యలపై స్పందించాలని మీడియా అడగగా..‘పవన్ కళ్యాణ్ రెండుచోట్ల ఎమ్మెల్యేగా పోటీ చేసి ఓడిపోయారు.. నేను రెండు సార్లు ఎమ్మెల్యేగా గెలిచాను.. రెండు సార్లు గెలిచిన నేను, రెండు సార్లు ఓడిపోయినవాని గురించి మాట్లడమంటే ఏం మాట్లాడాలి’సారీ అంటూ అంటూ అక్కడి నుంచి వెళ్లిపోయారట.

చంద్రబాబుకు పవన్ కళ్యాణ్ దత్తపుత్రడు అన్నారు మరో వైఎస్సార్‌సీపీ ఎమ్మెల్యే కొరుముట్ల శ్రీనివాసులు. కుల మత భేదాలు లేవని ఎప్పుడూ చెప్పే పవన్‌.. ఓ రోజు హిందువులు, మరో రోజు క్రిస్టియన్ల గురించి మాట్లాడుతూ మతాల మధ్య చిచ్చు పెడుతున్నారని మండిపడ్డారు. పవన్ జగన్‌ను సీఎంగా గుర్తించాల్సిన అవసరం లేదని.. ఆయన గుర్తిస్తే ఏంటి.. గుర్తించకపోతే ఏంటి అన్నారు. పవన్‌ పెళ్లి చేసుకున్న రష్యన్‌ భార్యకు పుట్టిన కూతురు కులం పాస్‌పోర్టులో ఏముందో చెప్పాలని ఘాటు వ్యాఖ్యలు చేశారు.