ఆయన కోర్టులకు దొరకడు.. వైసీపీ ఎమ్మెల్యే ఆసక్తికర వ్యాఖ్యలు

పత్రికా స్వేచ్ఛను హరిస్తున్నారంటూ ప్రతిపక్ష నేత చంద్రబాబు నాయుడు, ఆయన తాబేదారులు, అనుకూల మీడియా కలిసి దుష్ప్రచారం చేస్తున్నాయని వైఎస్సార్సీపీ ఎమ్మెల్యే ధర్మాన ప్రసాదరావు ఆగ్రహం వ్యక్తం చేశారు. జగన్ ప్రభుత్వాన్ని విమర్శించే నైతిక హక్కు చంద్రబాబుకు లేదని ఆయన అన్నారు. ఏపీలో పత్రికా స్వేచ్ఛ లేకుండా పోయిందని వ్యాఖ్యానించడం దారుణమన్నారు.

గత ఐదేళ్ల పాలనను చంద్రబాబు గుర్తుంచుకోవాలన్నారు. చట్టాలను మోసగించడం.. కోర్టులకు దొరక్కుండా తిరగడంలో బాబు దిట్ట అని ధర్మాన వ్యాఖ్యానించారు. ప్రజాధనాన్ని యథేచ్ఛగా దోచుకుతిన్నారని తీవ్ర ఆరోపణలు చేశారు. తన అనుచరులకు, అనుకూల సంస్థలకు దోచిపెట్టిన విషయం బహిరంగ రహస్యమేనన్నారు. చంద్రబాబు తన అనుకూల మీడియాను అడ్డుపెట్టుకుని అనేక మంది జీవితాలతో ఆడుకున్నారని, రాజకీయంగా తొక్కేయాలని చూశారని ఆరోపించారు. రాజకీయ పార్టీలను సర్వనాశనం చేసేందకు ప్రయత్నించారని ధ్వజమెత్తారు.

Also Read: చంద్రబాబు ఓకే చెబితే అధిష్టానంతో మాట్లాడతా.. బీజేపీ ఎంపీ సంచలన వ్యాఖ్యలు

వైఎస్సార్సీపీ అధికారంలోకి వచ్చి కేవలం నాలుగు నెలలే అయిందని ధర్మాన గుర్తు చేశారు. గత ఐదేళ్లలో చంద్రబాబు వ్యవస్థలను నిర్వీర్యం చేశారని మండిపడ్డారు. తనకు అనుకూలంగా పనిచేయడమే వ్యవస్థల పనిగా మార్చారని ఆరోపించారు. అలా నిర్వీర్యమైన వ్యవస్థలను గాడినపెట్టాలని సీఎం వైఎస్ జగన్ ప్రయత్నిస్తున్నారని, అందుకు కాస్త సమయం పడుతుందన్నారు.

ఈ నాలుగు నెలల్లోనే రాష్ట్రంలో ప్రజాస్వామ్యం లేదని, పత్రికా స్వేచ్ఛ హరించుకుపోయిందని వ్యాఖ్యానించడాన్ని తప్పుబట్టారు. రాష్ట్రంలో గూండాయిజం సాగుతోందని, బీహార్‌లా మారిపోయిందని మాట్లాడుతున్న చంద్రబాబు తన పాలనను గుర్తు చేసుకోవాలన్నారు. టీడీపీ హయాంలో ఎంత ధనం దోపిడీ అయిందో, రాష్ట్రం ఎంత అప్రతిష్టపాలైందో తెలియదా? అని ప్రశ్నించారు.