కులదూషణ : బాబును అరెస్టు చేయాలి.. వైఎస్సార్సీపీ ఎమ్మెల్యే డిమాండ్

టీడీపీ నేతలు కులం పేరుతో దూషించడం మానసికంగా కుంగదీసిందని తాడికొండ ఎమ్మెల్యే ఉండవల్లి శ్రీదేవి అన్నారు. తుళ్లూరు మండలం అనంతవరంలో జరిగిన వినాయక చవితి వేడుకల్లో పాల్గొనేందుకు వెళ్లిన సమయంలో ఒక సామాజిక వర్గ నేతలు కుల వివక్ష వ్యాఖ్యలు చేశారన్నారు. వినాయకుడిని ముట్టుకుంటే వినాయకుడు మైలపడతాడంటూ అనుచిత వ్యాఖ్యలు చేశారన్నారు. రాష్ట్ర రాజధానిలో కుల వివక్ష సంఘటన చోటు చేసుకోవడం దారుణమన్నారు. ఎమ్మెల్యే అయిన తనకే ఇలాంటి పరిస్థితి ఎదురైతే ఇక సామాన్యుల గతేంటని ఆమె ఆవేదన చెందారు.

Must Read : నేతలను మేపడం కోసం పేదల పొట్టకొడతారా? జగన్ సర్కార్‌పై చంద్రబాబు ఫైర్

టీడీపీ నేతలు చెప్పరాని మాటలతో మానసిక వేదనకు గురిచేస్తున్నారన్నారు. గతంలో చంద్రబాబు దళితుడిగా ఎవరైనా పుట్టాలని కోరుకుంటారా? అని మాట్లాడారు. యథా రాజా తథా ప్రజా అన్నట్లు టీడీపీ నేతలు కూడా ఆయన బాటలోనే నడుస్తున్నారన్నారు. టీడీపీ నేతలకు కుల రాజకీయం తలకెక్కిందని, రాజధానిలో వైఎస్సార్సీపీ గెలవడాన్ని టీడీపీ నేతలు జీర్ణించుకోలేక పోతున్నారని శ్రీదేవి అన్నారు. తనపై కుల వివక్షకు పాల్పడిన వారిని పెంచి పోషించింది చంద్రబాబేనని, చంద్రబాబును అరెస్టు చేయాలని ఆమె డిమాండ్ చేశారు.

Also Read :మద్యం అమ్మకాలపై 2 శాతం జే ట్యాక్స్.. ఎమ్మెల్సీ బుద్దా సంచలన ఆరోపణలు

రాజధానిలో వైస్సార్‌సీపీని ఓడించాలని టీడీపీ నేతలు కుటిల యత్నాలు చేశారన్నారు. రాజధానిలో జరిగిన అవినీతి అక్రమాలను వెలికితీసినందుకే ఒక సామాజిక వర్గం నేతలు తనపై కక్షసాధింపులకు పాల్పడుతున్నారన్నారు. భూములిచ్చిన దళిత రైతులకు ప్యాకేజీ ఇవ్వడంలో వివక్ష చూపారని ఆరోపించారు. దాడులను తట్టుకునే పరిస్థితిలో దళితులు లేరని, తెలుగుదేశంపై దళితులు తిరగబడే రోజులు దగ్గరలోనే ఉన్నాయన్నారు.

గతంలో మాజీ మంత్రి ఆదినారాయణ రెడ్డి దళితులు శుభ్రంగా ఉండరని చులకనగా మాట్లాడారన్నారు. దేశంలో ఇంతటి కుల వివక్ష ఎక్కడా చూడలేదని శ్రీదేవి అన్నారు. టీడీపీ ఇన్‌చార్జి శ్రావణ్ కుమార్ కూడా దళితుడే కదా.. ఒక దళిత మహిళకు అవమానం జరిగితే చూస్తూ ఉంటారా అని ప్రశ్నించారు. తనను కులం పేరుతో దూషించిన వ్యక్తులను అరెస్టు చేసి కఠినంగా శిక్షించాలన్నారు.