'చంద్రబాబు సిగ్గుగా లేదా.. ఆ బాధ్యత మేం తీసుకున్నాం'

ఓవైపు కరోనా కల్లోలం.. మరోవైపు లాక్‌డౌన్‌తో ఏపీలో రైతులకు కష్టాలు ఎదురయ్యాయి. పంట విషయంలో అన్నదాతలు గందరగోళంలో ఉన్నారు. అయితే రైతులు ఇబ్బందుల్లో ఉన్నారని ప్రభుత్వం పట్టించుకోవడం లేదని టీడీపీ ఆరోపిస్తోంది.. అయితే వారికి తాము అండగా ఉన్నామని పంటల్ని ప్రభుత్వమే కొనుగోలు చేస్తందని మంత్రులు చెబుతున్నారు. ఈ వ్యవహారంపై అధికార విపక్షాల మధ్య మాటల యుద్దం మొదలైంది. తాజాగా ఈ వ్యవహారంపై వైసీపీ ఎంపీ విజయసాయిరెడ్డి స్పందించారు.. రైతుల విషయంలో చంద్రబాబు మొసలి కన్నీరు కారుస్తున్నారని సెటైర్లు పేల్చారు.

ధరల స్థిరీకరణ నిధి చంద్రబాబు హయాంలో లేదన్నారు విజయసాయి. రైతుల ఆత్మహత్యలకు కారణమైన వ్యక్తి ఇప్పుడు వాటి గురించి మాట్లాడటానికి సిగ్గనిపించడం లేదా అంటూ మండిపడ్డారు. ప్రతి గింజ కొనుగోలు చేస్తామని సీఎం జగన్ గారు హామీ ఇచ్చారని.. పంట కోతలు యదావిధిగా జరగాలని ఆదేశించారని.. రైతు నష్టపోకుండా చూసే పూచీ ప్రభుత్వానిది అన్నారు.
14 ఏళ్లు సీఎంగా ఉండి ఎన్ని కోల్డ్ స్టోరేజీలు కట్టించావ్ చంద్రబాబూ అంటూ ప్రశ్నించారు ఎంపీ. రైతుల గురించి మొసలి కన్నీరు కారుస్తున్నారని.. రాష్ట్రంలో రైతులు, వ్యవసాయ కార్మికులు, కూలీలు ఎవరూ ఆకలితో బాధపడే పరిస్థితి లేదన్నారు. కరువు జాడ బాబుతోనే పోయిందని.. ఇంకెప్పుడూ రావొద్దని ప్రజలు కోరుకుంటున్నారని ఎద్దేవా చేశారు. ఇక హుదూద్, తిత్లీ తుఫాన్లను డీల్ చేశా అని చంద్రబాబు కటింగులిస్తున్నారని.. తుఫాన్ పోయిన నాలుగు రోజుల తర్వాత కూడా మంచినీళ్లు అందించలేని పాలన ఆయనది అంటూ సెటైర్లు పేల్చారు. వందల ట్యాంకర్లు సరఫరా చేసినట్టు బిల్లులు మింగారని.. శ్రీకాకుళంలో బస్సు వద్దకు బాధితులు వచ్చి నిలదీస్తే.. ఏయ్ మీదే వూరని గద్దించింది చంద్రబాబు కాదా అన్నారు.