బాబు కోవర్టుల కంట్రోల్‌లోకి ఏపీ బీజేపీ.. విజయసాయి సంచలన వ్యాఖ్యలు

ఏపీ బీజేపీ నేతలు టార్గెట్‌గా వైఎస్సార్సీపీ విజయసాయి రెడ్డి ఘాటు వ్యాఖ్యలు చేశారు. చంద్రబాబు కోవర్టులు నెమ్మదిగా బీజేపీ రాష్ట్ర శాఖను కంట్రోల్ చేసే స్థాయికి వచ్చారని విమర్శించారు. బీజేపీ ఏపీ చీఫ్ కన్నా లక్ష్మీనారాయణ, కార్యవర్గాన్ని పక్కకు నెట్టి కొద్దికొద్దిగా తమ ఆధీనంలోకి తెచ్చుకుంటున్నారని సంచలన వ్యాఖ్యలు చేశారు. రాజధాని, పోలవరం విషయంలో ప్రభుత్వ తీరు సరిగ్గా లేదని గవర్నర్‌కి ఫిర్యాదు చేసిన విషయాన్ని ప్రస్తావించారు.

Must Read : జగన్ బాబాయి ఇంటికి అఘోరాలు..

కన్నా లక్ష్మీనారాయణ, ఇతర కార్యదర్శులు కూడా లేకుండానే బీజేపీ నేతల బృందం గవర్నర్‌ విశ్వభూషణ్ హరిచంద్‌ని కలిసిందని విజయసాయి అన్నారు. బీజేపీపై కంట్రోల్ తెచ్చుకునే ప్రయత్నంలో ఉన్నారని, ఆ విషయం గవర్నర్‌ని కలిసిన సుజనా చౌదరి బృందాన్ని చూస్తే అర్థం అవుతోందన్నారు. బాబు బానిసలకు ప్రధాని మోదీ, బీజేపీ జాతీయాధ్యక్షుడు అమిత్ షా కంటే చంద్రబాబే ముఖ్యమని ఘాటుగా విమర్శించారు.

Also Read : ల్యాప్‌ట్యాప్‌ల మాయం కేసు.. కోడెల కుమారుడి కోసం పోలీసుల గాలింపు

వైఎస్ జగన్ ప్రభుత్వంపై బీజేపీ నేతలు గవర్నర్‌కి ఫిర్యాదు చేసిన విషయం తెలిసిందే. రివర్స్ టెండరింగ్ పేరుతో ప్రభుత్వం అనాలోచిత నిర్ణయాలు తీసుకుంటోందన్నారు. దాని వల్ల రాష్ట్రానికి జీవనాడి అయిన పోలవరం ప్రాజెక్టు పనులు ఆలస్యమవుతాయన్నారు. రాజధాని అమరావతి విషయంలోనూ ప్రభుత్వం ప్రజలను అయోమయానికి గురి చేస్తోందని గవర్నర్ దృష్టికి తీసుకెళ్లారు. మంత్రుల ప్రకటనలతో గందరగోళం ఏర్పడిందన్నారు. ఈ విషయాలపై సీఎం వైఎస్ జగన్ స్పందించడం లేదని విన్నవించారు.