YS Jagan పై ప్రధాని మోదీకి ఫిర్యాదు, ఎవరి మాటా వినట్లేదంటూ.. వైసీపీ రెబల్ ఎంపీ లేఖ

ముఖ్యమంత్రి వైఎస్ జగన్మోహన్ రెడ్డిపై వైఎస్సార్ కాంగ్రెస్ పార్టీ రెబల్ ఎంపీ రఘురామ కృష్ణరాజు ప్రధాని నరేంద్ర మోదీకి మరోసారి ఫిర్యాదు చేశారు. ఆంధ్రప్రదేశ్ ఆర్థిక పరిస్థితిపై ప్రధాని మోదీకి ఎంపీ రఘురామ లేఖ రాశారు. ఒక పని కోసం తీసుకొచ్చిన అప్పులు ఇతర పనులకు వాడటం రాజ్యాంగ వ్యతిరేకమని పేర్కొన్నారు.


ఆంధ్రప్రదేశ్‌లో ఆర్థిక పరిస్థితిపై కాగ్‌ లెక్కలను పరిగణనలోకి తీసుకోవాలని.. ఎస్‌ఎఫ్‌ఐవో లేదా సీబీఐ ఆర్థిక నేర విభాగంతో విచారణ జరిపించాలని ప్రధాని మోదీని ఎంపీ రఘురామ కోరారు. బ్యాంకులు, కార్పొరేషన్ల నుంచి రూ. వేల కోట్లు ఎలా సేకరించారో విచారణ జరిపించాలని కోరారు. అప్పులు తీసుకునేటప్పుడు ఏపీ సర్కార్ రాజ్యాంగ ఉల్లంఘనకు పాల్పడిందని లేఖలో ప్రస్తావించారు.

ఈ వ్యవహారంలో ఫోరెన్సిక్‌ ఆడిట్‌ కూడా చేయించాలని విజ్ఞప్తి చేశారు. విచారణ వేళ ముఖ్యమంత్రి వైఎస్ జగన్మోహన్ రెడ్డి, అధికారులను ప్రశ్నించాలనే నిబంధన సైతం విధించాలని రఘురామ విజ్ఞప్తి చేశారు. రాష్ట్రంలో సీఎం జగన్.. సీతయ్యలాగా వ్యవహరిస్తున్నారని, ఆయన ఎవరి మాట వినరని విమర్శించారు.