Janasena ఎమ్మెల్యేపై దుష్ప్రచారం.. రాపాకకు క్షమాపణలు చెప్పాలన్న పవన్

జనసేన ఏకైక ఎమ్మెల్యే రాపాక వరప్రసాద్ జగన్ సర్కారు ఇంగ్లిష్ మీడియాన్ని ప్రవేశపెడుతుండటాన్ని సమర్థించారు. పార్టీ మారనని ఆయన చెప్పినప్పటికీ.. భవిష్యత్తులో ఏం జరుగుతుందో చెప్పలేనన్నారు. పవన్ కళ్యాణ్‌కు, తనకు మధ్య గ్యాప్ ఉందన్నారు. రాపాక ఈ వ్యాఖ్యలు చేసిన అంనతరం.. ఆయన పార్టీ మారతారనే ఊహాగానాలు జోరందుకున్నాయి. పనిలో పనిగా రాపాక విషయంలో ఓ ఫేక్ న్యూస్ సోషల్ మీడియాలో వైరల్ అయ్యింది.

రాపాక వరప్రసాద్‌కు జనసేన అధినేత పవన్ కళ్యాణ్ షోకాజ్ నోటీసులు జారీ చేశారనే వార్త ప్రచారంలోకి వచ్చింది. దీనిపై రాపాక కూడా ఘాటుగా స్పందించారని ప్రచారం చేశారు. ‘‘నాకు ఎవరో షోకాజ్ నోటీసు ఇవ్వడం ఏంటి? నేను గెలిచిన ఎమ్మెల్యేను.. వాళ్లు ఓడిపోయిన వారు. ఇది మరీ విచిత్రంగా ఉంది.. పార్టీ మీద ఏదైనా అధికారం అనేది ఉంది అంటే నాకు మాత్రమే ఉంది. జనసేన పార్టీ వల్ల, ఆ కార్యకర్తలు వల్ల నేను గెలవలేదు.. నేను ఎవరి భిక్షతో ఎమ్మెల్యే కాలేదు.. నా సొంత శక్తి తో గెలిచాను తప్ప నాకు ఎవరి భిక్ష అవసరం లేద’’ని రాపాక అన్నట్టుగా వార్త వైరల్ అయ్యింది.

రాపాకకు తాను షోకాజ్ నోటీసు ఇచ్చానని తప్పుడు ప్రచారం జరుగుతోందని జనసేన అధినేత పవన్ కళ్యాణ్ స్పష్టం చేశారు. వైసీపీ మద్దతుదారులు జనసేనపై దుష్ప్రచారం ఆపాలని ఆయన హితవు పలికారు. తాను రైతు సౌభాగ్య దీక్షలో ఉంటే.. అసెంబ్లీలో ఉన్న రాపాకకు.. వైసీపీ సంబంధిత వెబ్‌సైట్‌లో రావడం చూస్తుంటే.. ఎవరు చేయించారో అర్థం అవుతోందన్నారు.

రాపాకను అరెస్ట్ చేసి బెయిల్ రానీయకుండా వైసీపీ నాయకులు ప్రయత్నించినప్పుడు.. స్వయంగా నేనే రంగంలోకి దిగడానికి వచ్చినప్పుడు వారు వెనక్కి తగ్గారన్నారు. తప్పుడు వార్తలు ప్రచురించినందుకు వైసీపీ మద్దతుదారులు రాపాక గారికి క్షమాపణలు చెప్పాలన్నారు.