నేను రష్యా వెళ్లింది అందుకే.. మంత్రి బాలినేని సంచలనం!

ఆంధ్రప్రదేశ్ విద్యుత్, అటవీ శాఖ మంత్రి బాలినేని శ్రీనివాస్ రెడ్డి ఇటీవల రష్యా పర్యటన తీవ్ర దుమారం రేపింది. మంత్రి బాలినేని రూ. 5 కోట్లు వెచ్చించి ప్రైవేటు విమానంలో వెళ్లాల్సిన అవసరం ఏముందంటూ తెలుగు దేశం పార్టీ పెద్ద ఎత్తు విమర్శలు గుప్పించింది. ‘హవాలా కింగ్’ అంటూ సంచలన ఆరోపణలు చేసింది. ఈ నేపథ్యంలో ఈ వ్యవహారంపై మంత్రి బాలినేని రియాక్ట్ అయ్యారు.

తన స్నేహితుడి పుట్టిన రోజు వేడుక కోసమే రష్యా వెళ్లినట్లు మంత్రి బాలినేని శ్రీనివాసరెడ్డి తేల్చి చెప్పారు. ఈ మేరకు బుధవారం మంత్రి బాలినేని మీడియాతో మాట్లాడుతూ.. రూ. 5 కోట్లు ఖర్చు పెట్టి ప్రైవేటు విమానం రష్యా వెళ్లానని తప్పుడు ప్రచారం చేశారని తప్పుబట్టారు. తన వెంట ఓ టీడీపీ ఎమ్మెల్యే ఉన్నాడని తెలియగానే ఎలాంటి వ్యాఖ్యలు చేయలేదని విమర్శించారు.


రెండు నెలల క్రితం తెలుగు దేశం పార్టీ అధినేత చంద్రబాబు ప్రత్యేక విమానంలో మారిషస్ వెళ్లారని.. రెండు ఎకరాలు పొలం నుంచి వచ్చిన వ్యక్తి ఏ పర్యటనకైనా వెళ్లవచ్చా అని మంత్రి బాలినేని ప్రశ్నించారు. ల్యాండ్ సీలింగ్స్‌లో వందల ఎకరాలు పోగొట్టుకున్న తాము ఏ పర్యటనకు వెళ్లకూడదా? అని ప్రశ్నించారు. ఎలాంటి దాపరికాలు లేకుండా రష్యా పర్యటన గురించి తానే ట్వీట్ చేశానని వెల్లడించారు. దొంగచాటుగా పర్యటనలకు వెళ్లాల్సిన అవసరం తనకు లేదన్నారు. చెన్నై హవాలా అంటున్నారని.. నోటికొచ్చిన అబద్ధాలు చెబితే ప్రజలు సహించరని బాలినేని శ్రీనివాసరెడ్డి హెచ్చరించారు.