నెల్లూరు: బైక్ సీటు తీస్తుంటే షాక్.. పరుగులుపెట్టిన జనాలు, ట్రాఫిక్ జామ్.. ఏమైందంటే!

నెల్లూరు జిల్లా ఆత్మకూరు సెంటర్‌లో ఉన్నట్లుండి ఒక్కసారిగా కలకలం రేగింది. బైక్‌ సీటు దెబ్బతినడంతో కొత్త కవరు కుట్టించుకునేందుకు మెకానిక్‌ షెడ్డుకు రాగా, సీటును తొలగిస్తుండగా పాము బుసలుకొడుతూ తల బయటకు పెట్టింది. దీంతో బైక్ యజమానితో పాటు, రోడ్డుపై వెళ్తున్న వారు ఒక్కసారిగా భయాందోళనకు గురై పరుగులు తీశారు. దీంతో ఏం జరుగుతుందో తెలుసుకునే లోపే అక్కడ తీవ్ర గందరగోళ వాతావరణం నెలకొంది. దెబ్బకు రోడ్డుపై పెద్ద ఎత్తున ట్రాఫిక్ జామ్ అయింది. ఈ సంఘటన ఆత్మకూరు పట్టణంలో శనివారం చోటుచేసుకుంది.
చేజర్ల మండలం భిల్లుపాడు గ్రామానికి చెందిన వేణుగోపాల్‌ తన బైక్‌కు సీటు కవరు కుట్టించుకునేందుకు ఆత్మకూరులోని ఆటోనగర్‌ వద్దకు వచ్చాడు. మెకానిక్‌ బైక్‌ సీటును ఊడదీస్తుండగా అందులో పాము కనిపించడంతో గట్టిగా అరిచాడు. దీంతో ఒక్కసారిగా భయభ్రాంతులకు గురై అక్కడున్న వారంతా పరుగులు తీశారు. అయితే మెకానిక్‌ మున్వర్‌ ధైర్యం చేసి పామును బయటకు తీసేందుకు ప్రయత్నించాడు.

కానీ, పాము బయటకు రాకపోవడంతో, పలు విధాలుగా ప్రయత్నించాడు. అయినా, పాము వెలుపలికి రాకపోవడంతో.. చివరకు జాగ్రత్తగా బైక్‌ విడిభాగాలు మొత్తం ఊడదీసి పామును బయటకు తీసి చంపేశారు. దీంతో అక్కడున్న వారంతా ఊపిరిపీల్చుకున్నారు. బైక్‌లో పామును తీయడాన్ని చూసేందుకు పలువురు గుమిగూడారు. చివరికి, బైక్ విడి భాగాలను మళ్లీ బిగించి యజమానికి ఇచ్చేశారు. పొలంలో బైక్ నిలిపి ఉంచినప్పుడు బండిలోకి పాము వచ్చి ఉంటుందని వాహనదారుడు వేణుగోపాల్ తెలిపారు.