ప్రకాశం: టీడీపీలోకి వచ్చేందుకు వైసీపీ నేత ఉత్సాహం.. ఆ రూట్‌లో లైన్ క్లియర్ చేసుకుంటున్నారా!

ప్రకాశం జిల్లాలో రాజకీయం ఆసక్తికరంగా మారింది. వైఎస్సార్‌సీపీపై అసంతృప్తితో ఉన్న మాజీ ఎమ్మెల్యే పాలపర్తి డేవిడ్ రాజు.. టీడీపీలోకి వచ్చేందుకు పావులు కదుపుతున్నారు. యర్రగొండపాలెం నేతలు వ్యతిరేకిస్తున్నా.. ఆయన మాత్రం పార్టీ మారేందుకు ప్రయత్నాలు ప్రారంభించారు. అధిష్టానం నుంచి గ్రీన్ సిగ్నల్ కోసం వ్యూహం మార్చారు.. ప్రకాశం జిల్లా టీడీపీ మాజీ అధ్యక్షుడు, కీలక నేత దామచర్ల జనార్థన్ ద్వారా ఒప్పించే ప్రయత్నం చేస్తున్నారు.

దామచర్ల జనార్థన్ డేవిడ్ రాజు ఇంటికి వెళ్లారు. ఇటీవల వివాహమైన డేవిడ్‌రాజు కుమారుడు దంపతులకు శుభాకాంక్షలు చెప్పారు. ఇద్దరు నేతలు కొద్దిసేపు సమావేశమయ్యారు.. తాజా పరిణామాలపై చర్చించినట్లు తెలుస్తోంది. డేవిడ్‌రాజు తిరిగి టీడీపీలోకి వ చ్చే ఆలోచనలో ఉన్నారనే సమాచారం రాష్ట్ర నాయకత్వానికి తెలుసని జనార్థన్ అన్నారు. తాను కూడా అవకాశం చూసుకొని చంద్రబాబును కలిసి డేవిడ్‌రాజును పార్టీలో చేర్చుకోవాలని కోరతానని చెప్పారు. గతంలో టీడీపీలో తనకు సముచిత స్థానం కల్పించారని.. కొన్ని కారణాల వల్ల పార్టీని వీడటం బాధ కలిగించిందన్నారు. తిరిగి తనతోపాటు, తన కుమారుడు, కోడలు కూడా పార్టీలో చేరేందుకు సిద్ధంగా ఉన్నామన్నారు. రాబోయే ఎన్నికల్లో ఒంగోలులో దామచర్ల జనార్దన్‌ గెలుపు కోసం కష్టపడి పనిచేస్తామని చెప్పారు.

యర్రగొండపాలెం కేడర్ డేవిడ్ రాజును పార్టీలోకి తీసుకోవద్దని తేల్చి చెప్పినా.. జనార్థన్ మాత్రం చంద్రబాబుతో మాట్లాడతానని చెప్పడం ఆసక్తికరంగా మారింది. మరి ఈ ప్రతిపాదనపై చంద్రబాబు ఎలా స్పందిస్తారన్నది ఆసక్తికరంగా మారింది. ఒకవేళ డేవిడ్ రాజును పార్టీలోకి తీసుకుంటే నియోజకవర్గ నేతలు, కార్యకర్తల్ని ఎలా బుజ్జగిస్తారన్నది చూడాలి. త్వరలోనే డేవిడ్ రాజు టీడీపీ ఎంట్రీపై క్లారిటీ వచ్చే అవకాశం ఉంది.

పాలపర్తి డేవిడ్ రాజు 1999లో సంతనూతలపాడు నియోజకవర్గం నుంచి ఎమ్మెల్యేగా గెలిచారు. 2014 ఎన్నికలకు ముందు వైఎస్సార్‌సీపీలో చేరి యర్రగొండపాలెం నుంచి ఎమ్మెల్యేగా విజయం సాధించారు.. ఆ తర్వాత టీడీపీలో చేరిపోయారు. మళ్లీ 2019 ఎన్నికల్లో తనకు టికెట్ దక్కకపోవడంతో తిరిగి వైఎస్సార్‌సీపీలోకి వచ్చారు. మళ్లీ ఇప్పుడు తిరిగి టీడీపీలోకి వచ్చేందుకు సిద్ధమయ్యారు.