ప్రకాశం: పచ్చటి పంటకు రంగు రంగుల చీరలతో అలంకరణ.. ఎందుకంటే!

ప్రకాశం జిల్లాలో రైతులు పచ్చని పంట పొలాలను రంగు రంగుల చీరలతో అలంకరించారు. దీంతో కోతకొచ్చిన పంట పైట గాలికి ఊగుతూ ఉంటే మరింతగా కళకళలాడుతున్నాయి. పంటను అడవి పందుల బారి నుంచి కాపాడుకోడానికి రైతన్నలు ఇలా వినూత్నంగా ఆలోచించారు. దేశ ప్రజల ఆకలి తీర్చే రైతు.. ఆ పంటను కాపాడుకోడానికి ఇలా ఎన్నో పాట్లుపడుతున్నాడు.

తాజాగా కోతికొచ్చిన పంటను అడవి పందుల నుంచి కాపాడుకోడానికి పొలం చుట్టూ చీరలతో కంచె వేశాడు. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. ప్రకాశం జిల్లాలోని పశ్చిమ ప్రాంతంలో కరువు కాటకాల వల్ల నీటి ఎద్దడితో ఆరుగాలం కష్టం చేసినా సరైన దిగుబడి లేక రైతులు నష్టపోతూనే ఉన్నారు. అయినా వ్యవసాయంపై మమకారం చావని రైతులు అష్టకష్టాలు పడి సాగుచేస్తూ ఉంటారు.

అయితే, చేతికొచ్చిన పంటను రాత్రి పూట అడవి పందులు గుంపులు గుంపులుగా వచ్చి పంటలను సర్వనాశనం చేస్తుంటాయి. దీంతో పందుల బారి నుంచి పంటలను రక్షించుకోవడానికి ఇలా చీరల అలంకరణ చేశామని స్థానిక రైతులు చెబుతున్నారు. యర్రగొండపాలెం, పుల్లలచెరువు, దోర్నాల, పెద్దారవీడు మండలాల్లోని నల్లమల అడవికి సమీపంలో ఉండే గ్రామాల్లోని రైతులు తమ బొప్పాయి, అరటి, మిర్చి పంటలను అడవి పందుల బారి నుంచి కాపాడుకునేందుకు పంట పొలాల చుట్టూ చీరలతో కంచె ఏర్పాటు చేసుకున్నారు.

అలా చేస్తే పంటలకు పందుల బెడద ఉండదని.. లేదంటే లక్షల రూపాయలు ఖర్చు చేసి పండించిన పంట చేతికి రాదని రైతులు ఆవేదన వ్యక్తం చేశారు. అలాగే, రాత్రి పూట పంట పొలాలకు కాపలా వెళ్లే రైతులపై కూడా పందులు దాడి చేస్తుంటాయని, పొలం చుట్టూ ఇలా చీరలు కట్టుకుంటే కాపలాకు వెళ్లాల్సిన అవసరం ఉండదంటున్నారు.