‘మహానాడు’కు పోటెత్తిన జనం.. ట్రాఫిక్ జామ్‌లో చిక్కుకుపోయిన చంద్రబాబు కాన్వాయ్

తెలుగు దేశం పార్టీ ఒంగోలులో చేపట్టిన మహానాడు కార్యక్రమానికి కార్యకర్తల నుంచి విశేష స్పందన లభించింది. మహానాడు ముగింపు సభ సందర్భంగా నిర్వహించిన బహిరంగ సభకు భారీ సంఖ్యలో కార్యకర్తలు తరలి వెళ్లారు. దీంతో సభా ప్రాంగణం కిక్కిరిసిపోయింది. మహానాడు రెండో రోజు సాయంత్రం సభలో పాల్గొనడం కోసం ఎన్‌ఎస్‌పీ గెస్ట్ హౌస్ నుంచి చంద్రబాబు నాయుడు బయల్దేరారు. కానీ ఈ సభకోసం మహానాడు ప్రాంగణానికి వెళ్లే మార్గంలో భారీగా ట్రాఫిక్ జామ్ ఏర్పడింది. దీంతో ఐదు కిలోమీటర్ల దూరంలో ఉన్న గెస్ట్ హౌస్ నుంచి సభా ప్రాంగణానికి రావడానికి 45 నిమిషాలు సమయం పట్టింది.

వేదిక వద్ద ఉన్న జనంతోపాటు.. బయట కూడా వేలాది మంది జనం ఒంగోలులో వేచి ఉన్నారు. పోలీసు ఎస్కార్ట్ మధ్య చంద్రబాబును సభా ప్రాంగణానికి తీసుకెళ్లారు.

మహానాడు కార్యక్రమం విజయవంతం కావడంతో టీడీపీ శ్రేణులు ఉత్సాహంతో ఉన్నాయి. ఈ కార్యక్రమంలో పార్టీ నేతలు అధికార వైఎస్సార్సీపీని టార్గెట్‌గా చేసుకొని విమర్శలు గుప్పించారు. ఎలాంటి పరిస్థితులు ఎదురైనా.. ఎవరు ఎన్ని కేసులు ఎదుర్కొంటున్నా.. వచ్చే ఎన్నికల్లో పార్టీని గెలిపించే బాధ్యతను కార్యకర్తలు తీసుకోవాలని వంగలపూడి అనిత పిలుపునిచ్చారు.