ప.గో: అతివేగానికి ముగ్గురు బలి... దెందులూరులో అర్ధరాత్రి ఘోర ప్రమాదం

పశ్చిమ గోదావరి జిల్లా దెందులూరులో ఘోర రోడ్డుప్రమాదం సంభవించింది. తొందరగా ఇంటికి చేరుకోవాలనే ఉత్సాహంతో వాహనాన్ని వేగంగా నడపడంతో అదికాస్తా అదుపుతప్పి డివైడర్‌ను దాటి అవతలి వైపుగా వస్తున్న బస్సును ఢీకొంది. ఈ ఘటనలో వ్యాను, బస్సు ముందుభాగాలు ధ్వంసమయ్యాయి. వ్యానులో ఉన్న ముగ్గురు యువకులు అక్కడికక్కడే మృత్యువాతపడ్డారు. ఈ ఘటన మంగళవారం అర్ధరాత్రి 12.30 గంటల సమయంలో దెందులూరు సమీపంలోని జాతీయ రహదారిపై జరిగింది.

Also Read: ఆళ్లగడ్డ: వాకింగ్‌కు వెళ్లిన యువకుడిపై కత్తులతో దాడి... రెండ్రోజుల్లో పెళ్లి

గుండగొలనుకు చెందిన పరసా రామకృష్ణ(25), వెలివెల గాంధీ(25), నాని (25)లు చేపలను పట్టి విక్రయిస్తుంటారు. ఈ క్రమంలో మంగళవారం అర్ధరాత్రి ఏలూరు వైపు నుంచి ముగ్గురూ వ్యానులో బయలుదేరారు. మరో ఐదు నిమిషాల్లో గుండగొలను చేరుకునే క్రమంలో అతివేగంతో వ్యాను అదుపుతప్పింది. డివైడర్‌ను దాటి రాజమహేంద్రవరం నుంచి హైదరాబాద్‌ వెళ్తున్న ఆర్టీసీ ఇంద్ర బస్సును ఢీకొంది.

ఈ ప్రమాదంలో వ్యాను నుజ్జునుజ్జు కావడంతో ముగ్గురు యువకులు అందులో ఇరుక్కుపోయి ప్రాణాలు కోల్పోయారు. బస్సులోని ప్రయాణికులందరూ క్షేమంగా బయటపడ్డారు. ప్రమాదంపై సమాచారం అందుకున్న దెందులూరు ఎస్‌ఐ రామ్‌కుమార్, సిబ్బందితో కలిసి ఘటన స్థలానికి చేరుకుని సహాయచర్యలు చేపట్టారు. హైవే పెట్రోల్‌ పోలీసులు వ్యాన్‌లో ఇరుక్కుపోయిన మృతదేహాలను బయటకు తీశారు. ఈ ప్రమాదం కారణంగా హైవేపై కొద్దిసేపు ట్రాఫిక్ నిలిచిపోయింది.