విశాఖ: వివాహ వేడుక జీవితాంతం గుర్తుండిపోయేలా.. గొప్ప నిర్ణయం, ఈ జంటకు హ్యాట్సాఫ్ చెప్పాల్సిందే

ప్రతి ఒక్కరి జీవితంలో వివాహం ఎప్పటికి మర్చిపోలేని జ్ఞాపకం. అందుకే ఈ వేడుకను కొందరు ఘనంగా, మరికొందరు వినూత్నంగా జరుపుకుంటారు. కానీ ఓ జంట మాత్రం తమ జీవితంలో గుర్తిండిపోయేలా పెళ్లి వేడుక చేసుకోవాల నిర్ణయం తీసుకున్నారు. తమ వివాహ వేడుక సాక్షిగా ఓ గొప్ప నిర్ణయం తీసుకున్నారు. అందరితో ప్రశంసలు అందుకుంటున్నారు.తూర్పుగోదావరి జిల్లా నిడదవోలు సమీపంలోని వేలివెన్నుకు చెందిన సతీష్ కుమార్‌, సజీవరాణిల పెళ్లికి ఈనెల 29న నిడదవోలులో ముహూర్తం ఫిక్స్ అయ్యింది. అయితే సతీష్ తాను వివాహం చేసుకునే రోజునే తనతో పాటు తన బంధువులు, స్నేహితులతో కలిసి అవయవదాన హామీ పత్రాలు సమర్పించాలని గొప్ప నిర్ణయం తీసుకున్నారు. కాబోయే భర్త ఆలోచనకు తోడుగా వధువు సజీవరాణి కూడా అవయవదాన హామీ పత్రం ఇచ్చేందుకు ముందుకు వచ్చారు.

విశాఖ సావిత్రిబాయి ఫులే ఎడ్యుకేషన్‌ అండ్‌ ఛారిటబుల్‌ ట్రస్ట్‌ ఛైర్‌పర్సన్‌ గూడూరు సీతామహాలక్ష్మి వీరి నుంచి హామీ పత్రాలను స్వీకరిస్తారు. వివాహ వేడుక సందర్భంగా ఏదైనా ఒక మంచి పనికి నాంది పలకాలని ఈ నిర్ణయం తీసుకున్నారు. ఈ జంట చెప్పిన వెంటనే బంధువులు, స్నేహితులు కూడా మద్దతు ఇచ్చారు. దాదాపు 60 మంది వరకు అవయవదాన హామీ పత్రాలు ఇచ్చేందుకు ముందుకు వచ్చారు.

అంతేకాదు వివాహ ఆహ్వాన పత్రికలో కూడా అవయవ దానం చేయండి- ప్రాణదాతలు కండి అంటూ పిలుపునిచ్చారు. అందరికీ అవయవదాన ఆవశ్యకతను ప్రచారం చేశారు. దీంతో సతీష్ కుమార్, సజీవరాణిల వినూత్న ఆలోచనతో అందరి ప్రశంసలు అందుకుంటున్నారు. ఒకవే మనం చనిపోయినా.. అవయవదానం చేస్తే మరికొందరు ప్రాణాలు నిలబడే అవకాశం ఉంటుందనే ఈ ఆలోచన చేశామంటున్నారు. విల్లింగ్‌ టు హెల్ప్‌ ఫౌండేషన్‌ సాయంతో ఈ కార్యక్రమానికి శ్రీకారం చుట్టాని తెలిపారు.

• Read Latest Andhra Pradesh Newsand Telugu News