తూ.గో: ఆలయంలో భక్తుల తలనీలాలు చోరీ.. ఆ జుట్టు ధర తెలిస్తే మతిపోవాల్సిందే!

ఇప్పటి వరకు ఆలయాల్లో హుండీలు బద్దలు కొట్టి డబ్బు ఎత్తుకుపోయిన దొంగల్ని చూసి ఉంటాం.. దేవుడి ఆభరణాలు దొంగిలించిన వారి గురించి విని ఉంటాం.. ఏకంగా భగవంతుడి విగ్రహాలనే చోరీ చేసిన ఘనుల గురించి చదివి ఉంటాం! కానీ, ఈ దొంగలు మాత్రం డిఫరెంట్.. దేవుడికి భక్తులు సమర్పించిన తలనీలాలనే దొంగిలించారు. హుండీలు బద్దలు కొట్టడం.. ఆ శబ్ధాలు ఎవరికైనా వినపడటం.. ఈ రిస్క్ అంతా ఎందుకనుకున్నారో, ఏమో గాని.. గుట్టుచప్పుడు కాకుండా భక్తుల తలనీలాలతో ఉడాయించారు. ఏకంగా 20 కేజీల జుట్టును దొంగలు చోరీ చేశారు.

తూర్పు గోదావరి జిల్లాలో ఈ ఘటన చోటు చేసుకుంది. జిల్లాలోని మామిడికుదురు మండలం అప్పనపల్లి శ్రీ బాల బాలాజీ స్వామి వారి ఆలయంలో కొందరు వ్యక్తులు తలనీలాలు చోరీ చేశారు. భక్తులు సమర్పించిన తలనీలాలు నిల్వ చేసిన గది నుంచి 20 కేజీల జుట్టును ఇద్దరు వ్యక్తులు దొంగలించారు. ఈ వ్యవహారంపై ఆలయ అధికారులు పోలీసులకు ఫిర్యాదు చేశారు. అలాగే దీనికి సంబంధించి సెక్యూరిటీ గార్డ్‌ను ఆలయ అసిస్టెంట్ కమిషనర్ సస్పెండ్ చేశారు.
కాగా, బుధవారం అర్ధరాత్రి జరిగిన ఈ వ్యవహారాన్ని సీసీటీవీ పుటేజీ ఆధారంగా అధికారులు గుర్తించారు. దీన్ని బట్టి నిందులను గుర్తించే పనిలో ఉన్నారు. ఇక, జుట్టు చోరీ చేస్తే ఎంత డబ్బు వస్తుందనే కదా అనుమానం. మార్కెట్‌లో తలనీలాలను విపరీతమైన డిమాండ్ ఉంటుంది. సినిమాల్లో విగ్గుల నుంచి వివిధ రకాల పరికరాల తయారీ వరకు జుట్టును విరివిగా వాడతారు. దేవస్థానాల్లో భక్తులు సమర్పించే జుట్టుకు మన దేశంతో పాటు, విదేశాల్లోనూ ఫుల్ డిమాండ్ ఉంటుంది. జుట్టు గ్రేడింగ్‌ను బట్టి ఒక కేజీ జుట్టు ధర రూ. 4 వేల నుంచి రూ. 30 వేల వరకు ధర పలుకుతుంది. దీన్ని బట్టి దొంగతనం చేసిన జుట్టు ధర కనీసం రూ. 25 వేల ధర పలికినా.. 20 కిలోల తలనీలాలకు రూ. 5 లక్షల వస్తుంది. ఈ వ్యవహారంపై పోలీసులు కేసు నమోదు చేసి సీసీటీవీ ఫుటేజీ ఆధారంగా నిందితుల కోసం గాలిస్తున్నారు.