కాకినాడ: యాసిడ్ లారీ బీభత్సం.. హోంగార్డు దుర్మరణం

కాకినాడ జిల్లా తొండంగి మండలం బెండపూడి జాతీయ రహదారిపై ఘోర రోడ్డు ప్రమాదం చోటుచేసుకుంది. శనివారం తెల్లవారు జామున 3 గంటల సమయంలో రోడ్డుపై ఒక్కసారిగా యాసిడ్ లోడుతో వెళ్తున్న లారీ బీభత్సం సృష్టించింది.

విశాఖపట్నం నుంచి యాసిడ్‌ లోడ్‌తో రాజమహేంద్రవరం వెళ్తున్న ఓ ట్యాంకర్‌.. బెండపూడి ఆర్టీఏ చెక్ పోస్ట్ వద్ద ఆగి ఉన్న లారీతో పాటు రోడ్డుపై మరో ఇద్దరిని ఢీకొట్టింది. ఈ ప్రమాదంలో హోంగార్డు గోవిందరాజులు తీవ్రంగా గాయపడ్డారు. ప్రాణాపాయ స్థితిలో ఉన్న గోవిందరాజులను ఆస్పత్రికి తరలిస్తుండగా మార్గమధ్యంలోనే ప్రాణాలు కోల్పోయారు.

లారీ దూసుకెళ్లడంతో తీవ్రంగా గాయపడ్డ మరో వ్యక్తిని స్థానిక ఆస్పత్రికి తరలించారు. అయితే, ఆస్పత్రిలో చికిత్స పొందుతూ బాధిత వ్యక్తి కూడా మరణించినట్లు తెలుస్తోంది. దీంతో రోడ్డు ప్రమాదంలో మృతి చెందిన వారి సంఖ్య ఇద్దరికి పెరిగినట్లు సమాచారం. ఈ విషయం తెలిసిన వెంటనే పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు చేపట్టారు.