పది రూపాయల డాక్టర్ ఇకలేరు.. విషాదంలో రాజోలు ప్రాంత వాసులు!

తూర్పుగోదావరి జిల్లా రాజోలు దీవిలో ఎందరో పేదలకు నామమాత్ర ధరకే వైద్య సేవలు అందించిన డాక్టర్ భూపతి నాగేశ్వర రావు మరణించారు. సోమవారం రాత్రి గుండెపోటు రావడంతో ఆయన మృతి చెందారు. కేవలం పది రూపాయల ఫీజు తీసుకొని భూపతి రావు వేలాది మందికి వైద్యం చేశారు. దీంతో ఆయన పది రూపాయల డాక్టర్‌గా గుర్తింపు తెచ్చుకున్నారు. రాజోలు దీవిలోని 4 మండలాల్లో 50 ఏళ్లపాటు ఆయన పేదలకు వైద్య సేవలు అందించారు.

పేదల దేవుడిగా పేరొందిన డాక్టర్ భూపతి నాగేశ్వర రావు మరణంతో రాజోలు ప్రాంత ప్రజలు తీవ్ర దిగ్భ్రాంతికి లోనయ్యారు. మహనీయుడు మరణించాడంటూ ఆవేదన వ్యక్తం చేస్తున్నారు. ఆయన లేని లోటు తీర్చలేమంటూ.. డాక్టర్ కుటుంబానికి ప్రగాఢ సానుభూతి వ్యక్తం చేస్తున్నారు.