ఏపీలో మద్యం అమ్మకాలకు ఆధార్‌ లింక్.. నెలకు 750 ML మాత్రమే.. అదిరే ప్లాన్, నేరుగా సీఎం జగన్‌కు..!

ఆంధ్రప్రదేశ్‌లో మద్యం పాలసీపై తెలుగు దేశం పార్టీ సీనియర్ ఎమ్మెల్యే గోరంట్ల బుచ్చయ్య చౌదరి సంచలన వ్యాఖ్యలు చేశారు. ముఖ్యమంత్రి వైఎస్ జగన్మోహన్ రెడ్డికి కీలక సూచనలు చేశారు. ఉచిత స్కీములపై ప్రభుత్వాలు ఆలోచనలు పక్కన పెట్టి, ద్వితీయ ఆదాయం వచ్చే మద్యం లాంటి వాటిని కట్టడి చేయాల్సిన అవసరం ఉందని తెలిపారు. మద్యపాన నిషేధం అని చెప్పి, ఇప్పుడు 75 శాతం ధరలు పెంచేసి తెలియని బ్రాండ్లతో జీవితాల్ని హరించివేస్తున్నారని దుయ్యబట్టారు.

ఇక, మద్యం అమ్మకాలను ఆధార్ కార్డుతో లింక్ చేయాల్సిన అవసరం ఉందని ఎమ్మెల్యే గోరంట్ల అభిప్రాయపడ్డారు. అలాగే ఒక్కో వ్యక్తికి నెలకు 750 మిల్లీ లీటర్లు (ఎం.ఎల్) మించకుండా అమ్మాలని సూచించారు. ఒకవేళ 750 ఎం.ఎల్ దాటితే వార్నింగ్ ఇచ్చి మళ్లీ పునరావృతం అయితే ప్రభుత్వ పథకాలు నిలిపేయాలన్నారు. మద్యాన్ని నేరుగా ఇంటికి ఇస్తే భార్య పిల్లల ఒత్తిడి మేరకు నియంత్రించగలమని.. ఈ ప్రక్రియ ద్వారా ఒక పద్ధతి ప్రకారం కట్టడి చేయొచ్చని తెలిపారు. ఈ మేరకు ఎమ్మెల్యే గోరంట్ల బుచ్చయ్య చౌదరి మంగళవారం సాయంత్రం ట్వీట్ చేశారు.


‘‘ఉచిత స్కీములపై ప్రభుత్వాలు ఆలోచనలు పక్కన పెట్టి, ద్వితీయ ఆదాయం వచ్చే మద్యం లాంటి వాటిని కట్టడి చేయాల్సిన అవసరం ఉంది. జీవితాలకు పెను ముప్పు ఈ మద్యం అనేది జగమెరిగిన సత్యం. మద్యపాన నిషేధం అని చెప్పి ఆదాయ వనరు కోసం 75 శాతం పెరిగిన ధరలతో తెలియని బ్రాండ్లతో జీవితాల్ని హరించివేస్తున్నారు. మీరు నిజంగా లిక్కర్‌ని నియంత్రించాలి అంటే ఒక వ్యవస్థను ఏర్పాటు చేసి లిక్కర్ కార్డులు నేరుగా ఆధార్ కార్డు లింక్ చేసి Systematic Approach ద్వారా వైద్య సూచనలు బట్టి నెలకి 750 ML ఒక వ్యక్తికి మించకుండా అందజేయాలి. అడిగిన వారికి రేషన్ లాగా ఒక నెలలో 750 ML దాటితే దాటితే వార్నింగ్ ఇచ్చి మరల పునరావృతం అయితే ప్రభుత్వ పథకాలు నిలిపేయండి.

నేరుగా ఇంటికి ఇస్తే భార్య పిల్లల ఒత్తిడి మేరకు నియంత్రించగలం. ఇంటికి ఇచ్చే ప్రక్రియ పెట్టి తద్వారా మనం దీనిని ఒక పద్ధతి ప్రకారం కట్టడి చేయొచ్చు. ఈ పద్ధతి కొన్ని రాష్ట్రాల్లో కూడా అమలు పరిచే ఆలోచనలో ఉన్నారు. ప్రస్తుతం ఉన్న పరిస్థితులు దృష్టిలో పెట్టుకుని నిర్ధిష్టమైన ప్రణాళిక ఏర్పాటు చేసి మీరు అన్న నిషేధం కాకపోయినా నియంత్రణ అయిన తీసుకురండి.’’ అని గోరంట్ల బుచ్చయ్య చౌదరి మద్యం పాలసీపై ఆసక్తికర కామెంట్స్ చేశారు.