రాజమండ్రి: పెళ్లిలో చితక్కొట్టుకున్న వధూవరుల బంధువులు.. కారణం తెలిస్తే అవాక్కవుతారు!

ఓ వివాహ వేడుక బంధవులు, స్నేహితులతో కళకళలాడుతోంది. వివాహం తర్వాత విందు జరుగుతోంది.. ఇంతలో చిన్న వివాదం పెద్ద గొడవకు దారి తీసింది.. వాగ్వాదం తర్వాత వధువు, వరుడు తరఫు బంధవులు ఒకరిపై మరొకరు దాడి చేసుకునే వరకు వెళ్లింది. ఈ ఘటనలో పలువురికి గాయాలు అయ్యాయి. తూర్పుగోదావరి జిల్లాలో జరిగిన ఈ ఘటన స్థానికంగా కలకలంరేపింది. సీతానగరం మండలం రామచంద్రపురంలో వివాహ వేడుక జరిగింది.. భారీగా ఏర్పాట్లు చేశారు. పెళ్లికుమార్తె తరఫు బంధువులంతా తాళ్లపూడి మండలం గజ్జరం నుంచి వచ్చారు. పెళ్లి తర్వాత విందు జరుగుతోంది.. ఆ సమయంలో వధూవరులిద్దరూ డ్యాన్స్‌ చేయాలని అక్కడ కొందరు ఒత్తిడి చేశారు. ఈ విషయంలో వధువు తరఫు బంధువులు అభ్యంతరం తెలిపారు. ఆడపిల్ల డ్యాన్స్‌ చేయడమేంటని ప్రశ్నించారు.. ఈ క్రమంలో వాగ్వాదం జరిగింది.
ఇరువురి మధ్య మాటామాటా పెరిగి వరుడి కుటుంబసభ్యులు వధువు బంధువులపై దాడికి దిగారు. ఈ ఘటనలో ఓ మహిళకు తల పగలింది.. మరొకరికి చేయి విరగ్గా.. మరో ముగ్గురికి స్వల్పంగా గాయాలు అయ్యాయి. ఈ ఘటనపై సమాచారం అందుకున్న పోలీసులు అక్కడికి చేరుకుని గాయపడిన వారిని రాజమండ్రి ఆస్పత్రికి తరలించారు. అనంతరం రెండు వర్గాలు ఫిర్యాదు ఇచ్చేందుకు పోలీస్‌స్టేషన్‌కు వెళ్లారు. డ్యాన్స్ విషయంలో మొదలైన చిన్న వివాదం ఇలా కొట్లాట వరకు వెళ్లింది. ఈ ఘటనకు సంబంధించి పూర్తి వివరాలు తెలియాల్సి ఉంది.

• Read Latest Andhra Pradesh News and Telugu News