ఆమెకు 30, అతడికి 19 ఏళ్లు: రెండేళ్లుగా సహజీవనం.. పెళ్లి చేసుకోవాలని అడిగితే.. షాకింగ్!

ఆమెకు 30 సంవత్సరాలు, ఇద్దరు బిడ్డల తల్లి.. అతడికి 19 ఏళ్లు, ఆటో డ్రైవర్.. ఇద్దరూ కలిసి రెండేళ్లుగా సహజీవనం చేస్తున్నారు. అయితే, పెళ్లి చేసుకోవాలని ఆమె నిలదీయడంతో అతడు విచక్షణ కోల్పోయి దారుణంగా హతమార్చాడు. మూడేళ్ల వయసున్న ఆమె కూతురును నడిరోడ్డుపై వదిలేసి పరారయ్యాడు. చివరికి పోలీసులకు చిక్కాడు. ఈ సంఘటన తూర్పు గోదావరి జిల్లా కాజులూరు మండలం శీల పంచాయతీ శివారు శీలలంకలో జరిగింది.

పోలీసులు తెలిపిన వివరాల మేరకు.. శంఖవరం మండలం ఎరకాపురానికి చెందిన రమణమ్మ (30)కు అదే గ్రామానికి చెందిన వ్యక్తితో వివాహమైంది. వారికి ఇద్దరు కుమార్తెలు ఉన్నారు. అయితే, అదే గ్రామానికి చెందిన ఆటో డ్రైవర్‌ జె.వెంకటశివరామరాజు (19) రమణమ్మతో పరిచయం పెంచుకున్నాడు. తర్వాత, ప్రేమిస్తున్నానని చెప్పడంతో.. గత రెండేళ్లుగా శీలలంకలోని ఓ రొయ్యల చెరువుల వద్ద పనికి కుదిరి ఇద్దరూ అక్కడే సహజీవనం సాగిస్తున్నారు. రమణమ్మ మూడేళ్ల చిన్న కుమార్తె వారితోనే ఉంటోంది.

అయితే, తనను పెళ్లి చేసుకోవాలని రమణమ్మ ఒత్తిడి తీసుకొస్తుండటంతో వీరిద్దరి మధ్య తరచూ గొడవలు జరుగుతుండేవి. మూడు రోజుల క్రితం కూడా గొడవ పడి రాత్రికిరాత్రే ముగ్గురూ మాయమైనట్లు రొయ్యల చెరువుల యజమాని ఎం.వేణుగోపాల్‌ శుక్రవారం గొల్లపాలెం పోలీసులకు ఫిర్యాదు చేశారు. దీంతో, విచారణ చేపట్టిన పోలీసులు శనివారం అర్ధరాత్రి నిందితుడిని అదుపులోకి తీసుకుని.. తమదైన శైలిలో విచారించగా, అసలు విషయం వెలుగులోకి వచ్చింది.

రమణమ్మను ఇనుపరాడ్డుతో కొట్టి హతమార్చి, తాను పని చేస్తున్న చెరువుల వద్దే పూడ్చిపెట్టడడంతో పాటు ఆమె కూతురును పిఠాపురంలో రోడ్డు పక్కన వదిలి పరారైనట్లు నిర్ధారించారు. కాకినాడ రూరల్‌ సీఐ ఆకుల మురళీకృష్ణ ఆధ్వర్యంలో ఆదివారం నిందితుడిని సంఘటనా స్థలానికి తీసుకొచ్చి.. తహసీల్దారు బి.సాయిసత్యనారాయణ, వైద్యుల సమక్షంలో రమణమ్మ మృతదేహన్ని వెలికితీసి పంచనామా నిర్వహించారు. ఈ మేరకు కేసు నమోదు చేశామని, నిందితుడిని కోర్టులో హాజరుపరచనున్నట్లు సీఐ తెలిపారు. ప్రస్తుతం ఆ చిన్నారి స్త్రీ, శిశు సంక్షేమ శాఖ సిబ్బంది సంరక్షణలో ఉందని ఆయన చెప్పారు.