ఉండ్రాజవరం: నిద్రలో నడిచే అలవాటు.. మహిళ నిండు ప్రాణం బలి

తూర్పుగోదావరి జిల్లాలో విషాద ఘటన జరిగింది. ఉండ్రాజవరంలో చెరువులో పడి మహిళ ప్రాణాలు కోల్పోయింది. ఉండ్రాజవరంలోని లింగాలదిబ్బకు చెందిన మహిళ సింహాచలం కొంత కాలంగా మానసికమైన సమస్యలతో ఇబ్బందిపడుతున్నారు. దీంతో ఆమె నిద్రలో లేచి నడిచే అలవాటు ఉందని కుటుంబ సభ్యులు చెబుతున్నారు. ఈ క్రమంలో ఆదివారం తెల్లవారుజామున 2 గంటల సమయంలో మహిళ బయటకు వెళ్లారు. కొంతసేపటి తర్వాత ఆమె మంచం మీద లేకపోవడాన్ని గమనించిన భర్త వెంకటరమణ, ఇద్దరు కుమార్తెలు సింహాచలం కోసం గాలించారు. ఇంతలో దగ్గరలో ఉన్న చెరువులో ఆమె మృతదేహాన్ని గుర్తించారు. చెరువులో విగతజీవిగా కనిపించడంతో కుటుంబ సభ్యులు కన్నీళ్లు పెట్టుకున్నారు. మహిళ తండ్రి ఫిర్యాదుతో పోలీసులు కేసు నమోదు చేశారు. ఆమె కుటుంబ సభ్యులను ప్రశ్నిస్తున్నారు. నిద్రలో నడిచే అలవాటు ఉండటంతోనే ఆమె చెరువులో ప్రమాదవశాత్తూ పడిపోయారా.. ఇంకేదైనా కారణం ఉందా అని ఆరా తీస్తున్నారు. ఈ ఘటనకు సంబంధించిన పూర్తి వివరాలు తెలియాల్సి ఉంది.

• Read Latest Andhra Pradesh Newsand Telugu News