YSRCP లో అలజడి: ఎంపీ, ఎమ్మెల్యేల మధ్య ఆధిపత్య పోరు.. టీడీపీతో కలిసి.. షాకింగ్ కామెంట్స్!

తూర్పు గోదావరి జిల్లా అధికార వైఎస్సార్ కాంగ్రెస్ పార్టీలో ఆధిపత్య పోరు మొదలైంది. జిల్లాలోని రాజానగరం ఎమ్మెల్యే జక్కంపూడి రాజా- రాజమహేంద్రవరం వైసీపీ ఎంపీ మార్గాని భరత్ రామ్ మధ్య కోల్డ్ వార్ ముదిరింది. ఈ నేపథ్యంలో ఎంపీ మార్గాని భరత్‌పై ఎమ్మెల్యే జక్కంపూడి రాజా సంచలన వ్యాఖ్యలు చేశారు. తమ పార్టీలోని ఒక నాయకుడు తెలుగు దేశం పార్టీ నాయకులతో కుమ్మక్కై తనపై బురదజల్లే ప్రయత్నాలు చేస్తున్నారని ఎమ్మెల్యే జక్కంపూడి రాజా ఆరోపించారు.

ఈ మేరకు రాజమహేంద్రవరంలో ఏర్పాటు చేసిన విలేకర్ల సమావేశంలో ఎమ్మెల్యే రాజా మాట్లాడుతూ.. పార్టీకి నష్టం కలిగించిన వారిని, కేసులు ఉన్నవారిని దూరంగా పెడితే.. వారిని తీసుకువచ్చి పార్టీలో అలజడి సృష్టించే ప్రయత్నాలు చేస్తున్నారని సంచలన వ్యాఖ్యలు చేశారు. దీంతో పార్టీకి నష్టం కలిగే పరిస్థితులు ఏర్పడుతున్నాయని ఎంపీ భరత్‌ రామ్‌ను ఉద్దేశించి జక్కంపూడి సంచలన వ్యాఖ్యలు చేశారు.

ప్రభుత్వానికి వ్యతిరేకంగా ధర్నాలు, ఆందోళనలు చేస్తున్న సీతానగరానికి చెందిన ప్రభుత్వ ఉపాధ్యాయుడిని సస్పెండ్‌ చేస్తే అతడికి వత్తాసు పలకడం సరికాదని ఎమ్మెల్యే రాజా అన్నారు. పురుషోత్తపట్నం ఎత్తిపోతల పథకానికి రైతులకు పరిహారం చెల్లించాల్సి ఉండగా, కొందరు రైతులతో రాజమహేంద్రవరంలో బ్యాంకు ఖాతాలు తెరిపించి పెద్దఎత్తున వసూళ్లకు పాల్పడే ప్రయత్నాలు చేస్తున్నారని విమర్శలు గుప్పించారు.

అధికారంలో ఉన్నప్పుడు అభివృద్ధి చేయని మాజీ ఎమ్మెల్యే పెందుర్తి వెంకటేష్.. ఇప్పుడు అభివృద్ధి గురించి మాట్లాడటం విడ్డూరంగా ఉందని ఎమ్మెల్యే రాజా వ్యాఖ్యానించారు. వైసీపీ అధికారంలోకి వచ్చాక రూ. 150 కోట్లతో నియోజకవర్గంలో పలు అభివృద్ధి పనులు చేపట్టానని తెలిపారు. దీనిపై త్వరలో శ్వేతపత్రం విడుదల చేస్తానని జక్కంపూడి రాజా స్పష్టం చేశారు.