స్నేహితుడితో కలిసి బయటికెళ్లి.. ఇంటికి రాని యువకుడు.. శ్రీకాకుళం జిల్లాలో ఘోరం

శ్రీకాకుళం జిల్లాలో విషాదం చోటు చేసుకుంది. స్నేహిలతో కలిసి బయటకు వెళ్లిన ఓ యువకుడు అనుమానాస్పద రీతిలో ప్రాణాలు వదిలాడు. ఈ ఘటన వివరాల్లోకి వెళ్తే.. నందిగామ మండలంలోని భర్తుపుర గ్రామానికి చెందిన నాగమ్మ, మన్మథ రావు దంపతుల ఏకైక కుమారుడు బగాది నవీన్ (22). గురువారం ఉదయం బైరిబొడ్డుపాడు జంక్షన్ వద్ద అచేతన స్థితిలో కనిపించాడు.

పోలీసులు తెలిపిన వివరాల ప్రకారం.. భర్తుపుర గ్రామానికే చెందిన బగాది జానకీ రామ్ అనే యువకుడు తన స్నేహితుడైన జగన్నాయకులకు ఫోన్ చేసి.. తాను శ్రీకాకుళం నుంచి టెక్కలి వస్తున్నానని.. టెక్కలి వచ్చి పికప్ చేసుకోవాలని కోరాడు. దీంతో జగన్నాయకులు బైక్ మీద నవీన్ దగ్గరొచ్చాడు. ఇద్దరూ కలిసి టెక్కలి వెళ్లి జానకీరామ్‌ను బండి ఎక్కించుకున్నారు.

ఆ తర్వాత ముగ్గురూ కలిసి మద్యం సేవించి బైరిబొడ్డపాడు జంక్షన్ వద్ద కాసేపు విశ్రాంతి తీసుకున్నారు. కాగా అదే సమయంలో నవీన్ అపస్మారక స్థితికి చేరుకున్నాడు. అతణ్ని జాగ్రత్తగా తమతో తీసుకు రావాల్సిన స్నేహితులిద్దరూ నవీన్‌ను అక్కడే వదిలేసి సొంతూరు వచ్చేశారు.

గురువారం ఉదయం జంక్షన్‌ వద్ద నవీన్ మృతదేహాన్ని గుర్తించిన స్థానికులు.. అతడి తల్లిదండ్రులకు సమాచారం ఇచ్చారు. ఒక్కగానొక్క కొడుకు ఇలా అనుకోని రీతిలో చనిపోవడంతో అతడి తల్లి రోదించిన తీరు గ్రామస్థులను కలచి వేసింది. అపస్మారక స్థితికి వెళ్లిన నవీన్ గురించి అతడి స్నేహితులు ఊళ్లో ఎవరికీ చెప్పకపోవడం అనుమానాలకు తావిస్తోంది. నవీన్ ఎక్కడని అడిగిన వారికి ఎక్కడో పడుకొని ఉంటాడంటూ వారు నిర్లక్ష్యంగా సమాధానం ఇచ్చారు. దీంతో అతణ్ని వారే హత్య చేసి ఉంటారనే అనుమానాలు వ్యక్తం అవుతున్నాయి. మృతుడి తండ్రి మన్మథరావు ఫిర్యాదు మేరకు నందిగాం ఎస్సై సనపల బాలరాజు కేసు దర్యాప్తు చేస్తున్నారు.