దసరా ఎఫెక్ట్.. కిలోమీటర్ల మేర వాహనాలు.. టోల్‌ప్లాజా వద్ద వాహనాల రద్దీ

తెలుగు రాష్ట్రాల్లో పెద్ద పండగలంటే గుర్తొచ్చేది దసరా, సంక్రాంతినే. ఈ రెండు పండగలకి ఎక్కడెక్కడ ఉన్నోళ్లంతా సొంతూళ్లకి చేరుకోవాల్సిందే. దాంతో సొంతూళ్లకి వెళ్లడానికి కొందరు ట్రైన్, బస్సుల్లో రిజర్వేషన్లు చేసుకుంటే.. మరికొందరు కార్లలో ప్రయాణిస్తుంటారు. కాలేజీలకు కూడా దసరా సెలవులు ప్రకటించడంతో హైదరాబాద్-విజయవాడ జాతీయ రహదారి కిక్కిరిసింది. శని, ఆదివారాలు సెలవులు కావడం.. కాలేజీలకు కూడా పండగ సెలవులు ప్రకటించడంతో హైవేపై వాహనాల రద్దీ పెరిగింది. ముఖ్యంగా హైదరాబాద్- విజయవాడ జాతీయ రహదారిపై, హైదరాబాద్-వరంగల్ రహదారిపై రద్దీ పెరిగింది. పంతంగి, కొర్లపహాడ్, గూడూరు టోల్ ప్లాజాతో పాటు ఆంధ్రా బార్డర్‌లోని టోల్‌ప్లాజాకు వాహనాల తాకిడి పెరిగింది. రోజూ వచ్చే వాహనాల కంటే అదనంగా ఐదు వేల వాహనాలు వస్తుండటంతో అధికారులు ట్రాఫిక్ చర్యలు చేపట్టారు.