కడపలో ప్రేమోన్మాది ఘాతుకం.. కత్తితో దారుణంగా పొడిచి.. ఘోరం

కడప జిల్లా ప్రొద్దుటూరులో దారుణ ఘటన చోటుచేసుకుంది. టీనేజ్ యువతిపై ప్రేమోన్మాది ఘాతుకానికి తెగబడ్డాడు. కత్తితో దాడి చేసి కిరాతకంగా పొడిచి చంపేందుకు ప్రయత్నించాడు. తల, చేతులపై విచక్షణా రహితంగా దాడి చేశాడు. ఈ ఘటనతో ప్రొద్దుటూరు పట్టణంలో కలకలం రేగింది. పట్టణానికి చెందిన యువకుడు సునీల్ అదే ప్రాంతానికి చెందిన టీనేజ్ యువతి(17) వెంట పడుతున్నాడు. మూడు నెలలుగా ఆమెను వేధింపులకు గురిచేస్తున్నాడు. ఆమె అతన్ని పట్టించుకోవడం లేదన్న కోపంతో దారుణానికి పాల్పడ్డాడు. మచ్చు కత్తితో ఆమెపై దాడి చేశాడు. చేతులు, తలపై కత్తితో పొడవడంతో తీవ్రగాయాలయ్యాయి. ఆమెను ఆస్పత్రికి తరలించి చికిత్స అందిస్తున్నారు.

అయితే టీనేజ్ యువతి, సునీల్ ఇద్దరూ గతంలో ప్రేమించుకున్నట్లు సమాచారం. సునీల్ తాగుబోతు కావడంతో యువతికి కుటుంబ సభ్యులు నచ్చజెప్పినట్లు తెలుస్తోంది. కొద్దిరోజుల్లో కాలేజీ హాస్టల్‌కి పంపిస్తే అన్నీ సర్దుకుంటాయని భావించారు. కొద్దికాలంగా ఆమె దూరం పెడుతుండడంతో కోపం పెంచుకున్న సునీల్ ఈ ఘాతుకానికి పాల్పడినట్లు చెబుతున్నారు. సమాచారం అందుకున్న పోలీసులు ఆస్పత్రికి వెళ్లి వివరాలు సేకరిస్తున్నారు. ఘటన జరిగిన తీరుపై ఆరా తీస్తున్నారు.

Also Read: