చొక్కా విప్పేసిన సీపీఐ నేత నారాయణ.. ప్రధాని మోదీ గడ్డంతో పోలుస్తూ..!

పెట్రోలు ధరల పెంపు విషయంలో భారతీయ కమ్యూనిస్టు పార్టీ (సీపీఐ) జాతీయ కార్యదర్శి నారాయణ వినూత్న నిరసన ప్రదర్శన నిర్వహించారు. చిత్తూరు జిల్లా తిరుపతిలో పెట్రోల్ ధరల పెంపును సీపీఐ నేత నారాయణ నిరసించారు. చొక్కా విప్పేసి ఆందోళన చేపట్టారు. బట్టలు విప్పేసి ఓ పెట్రోల్ బంక్ దగ్గర ప్రజల నుంచి అభిప్రాయాలను తెలుసుకున్నారు. ఈ సందర్భంగా పెట్రోల్ ధరల పెంపుతో తాము పడుతున్న ఇబ్బందులను ప్రజలు నారాయణకు వివరించారు.


ప్రధాని నరేంద్ర మోదీ గడ్డం పెరిగినట్లు పెట్రోల్ ధరలు పెరుగుతున్నాయని నారాయణ ఎద్దేవా చేశారు. రాష్ట్రంలో పెట్రోల్, డీజిల్‌ను జీఎస్టీ పరిధిలోకి తేవాలని ఆయన డిమాండ్ చేశారు. కేంద్ర, రాష్ట్ర ప్రభుత్వాలు పెట్రోల్‌పై పన్నులు వేయడం వల్లే ఈ దుస్థితి ఏర్పడిందని నారాయణ పేర్కొన్నారు. పెట్రోలు ధరల పెంపు వల్ల ప్రజలు తీవ్ర ఇబ్బందులు ఎదుర్కొంటున్నారని మండిపడ్డారు.

కేంద్ర, రాష్ట్ర ప్రభుత్వాలు పోటీ పడి మరీ పెట్రోలు, డీజిల్ ధరలు పెంచుతున్నాయని నారాయణ అన్నారు. పెట్రోలు ధర తమిళనాడు కంటే ఆంధ్రప్రదేశ్‌లో 7 రూపాయిలు ఎక్కువగా ఉందన్నారు. జగన్ ప్రభుత్వం ధరలు భారీగా పెంచుతుందని పేర్కొన్నారు. కేంద్ర, రాష్ట్ర ప్రభుత్వాలు కలిసి పెట్రోలును జీఎస్టీ పరిధిలోకి తీసుకురావాలన్నారు. ఇక, పెట్రోలు ధరల పెంపునకు వ్యతిరేకంగా నారాయణ చొక్కా విప్పేసి నిరసనలో పాల్గొనడంతో అక్కడున్న వారు ఆశ్చర్యపోయారు.