AP: గాలికి లేచిన టెంట్.. కరెంట్ షాక్‌తో నలుగురి మృతి, ఎంత ఘోరం?

శుభకార్యం కోసం ఇంటి ముందు వేసిన టెంట్.. గాలి దుమారానికి లేచిపోయింది. విద్యుత్ తీగలకు తాకింది. విద్యుత్ ప్రసారమై నలుగురు మృతి చెందారు. శుభకార్యం జరగాల్సిన ఇంట్లో బంధువుల రోదనలతో విషాదం అలుముకుంది. ఈ హృదయవిదారక ఘటన అన్నమయ్య జిల్లా పెద్ద తిప్పసముద్రం మండలం కానుగమాకులపల్లి గ్రామంలో శుక్రవారం (ఏప్రిల్ 14) చోటు చేసుకుంది. గృహప్రవేశ కార్యక్రమం నిమిత్తం వేసిన టెంట్.. గాలికి లేచి, 11 కేవీ విద్యుత్ లైన్‌కు తగలడంతో కరెంట్ ప్రసారమై ఘటనా స్థలంలోనే ఇద్దరు మృతి చెందారు. తీవ్రంగా గాయపడిన మరో నలుగురిని ఆస్పత్రికి తరలించారు. ఆస్పత్రిలో చికిత్స పొందుతూ మరో ఇద్దరు మృతి చెందారు. ఇంకో ఇద్దరు చికిత్స పొందుతున్నారు. మృతుల్లో ఒకే కుటుంబానికి చెందిన అవ్వ, మనవడు ఉన్నారు.

కొత్తకోట మండలం కొత్తపల్లికి చెందిన లక్ష్మమ్మ (70), ఆమె మనవడు విజయ్ ప్రశాంత్ (25) ఘటనాస్థలంలోనే మరణించారు. వడిగలవారిపల్లెకు చెందిన లక్ష్మణ (53) కొత్తకోటకు చెందిన శాంత కుమారి (48) ఆసుపత్రికి తరలిస్తుండగా మృతి చెందారు. సునీత (40), సుధాకర్ (47) ఆస్పత్రిలో చికిత్స పొందుతున్నారు.

మృతదేహాలకు మదనపల్లి జిల్లా ఆసుపత్రిలో పోస్టుమార్టం నిర్వహించి కుటుంబసభ్యులకు అప్పగించారు. టీడీపీ రాంజపేట పార్లమెంట్‌ నియోజకవర్గ ఇన్‌ఛార్జి గంటా నరహరి.. మృతుల కుటుంబాలకు రూ. 30,000 చొప్పున సాయం అందజేశారు.