జగన్ సర్కారుకు తమిళనాడు ఊహించని గిఫ్ట్.. అవన్నీ చిత్తూరుకు షిఫ్ట్..!

ఏపీలో జగన్ సర్కారు అధికారంలోకి వచ్చాక సంక్షేమానికి మాత్రమే ప్రాధాన్యం ఇస్తున్నారని.. అభివృద్ధిని గాలికి వదిలేశారని చాలా మంది విమర్శలు గుప్పిస్తున్న సంగతి తెలిసిందే. ప్రజల సంక్షేమం ముఖ్యమే కానీ.. అభివృద్ధి లేకపోతే ఎలా..? అని చాలా మంది ప్రశ్నిస్తున్నారు. ఇలాంటి వారికి సమాధానం చెప్పేలా జగన్ సర్కారు గట్టి ప్రయత్నమే చేస్తోందని తెలుస్తోంది. చెన్నై ఇండస్ట్రియల్ ఏరియాలోని పలు పరిశ్రమలను చిత్తూరు జిల్లాకు తరలించడం కోసం ఏపీ ప్రభుత్వం కసరత్తు చేస్తోంది.

చెన్నై నగరానికి సమీపంలోని అంబత్తూరులో 1964లో ఇండస్ట్రియల్ పార్కును ఏర్పాటు చేశారు. కానీ నగరం విస్తరించడంతో.. పారిశ్రామికవాడ ఇప్పుడు చెన్నైలో భాగమైంది. ఇక్కడ కొత్త ఇండస్ట్రీలను ఏర్పాటు చేయడానికి అవకాశం లేకపోగా.. కాలుష్యం బెడదతో ఉన్నవాటినే ఇక్కడి నుంచి ఇతర ప్రాంతాలకు తరలించాలని తమిళనాడు పరిశ్రమల శాఖ నిర్ణయించింది.

ఇదే అదనుగా.. ఏపీ పరిశ్రమల శాఖ అధికారులు తమిళనాడు ప్రభుత్వంతో చర్చలు జరిపారు. అంబత్తూరులోని కొన్ని ఇండస్ట్రీలను చెన్నైకి చేరువగా ఉండే నగరి నియోజకవర్గానికి తరలించాలని ప్రతిపాదించారు. నగరి నియోజకవర్గ పరిధిలోని విజయపురం మండలంలోని కోసల నగరం గ్రామంలో ఏపీఐఐసీకి దాదాపు 2 వేల ఎకరాల భూమి ఉంది.

Read Also: ఘరానా దొంగ.. తన దగ్గరకు రప్పించుకొని మరీ.. రూ.25 లక్షల బంగారం చోరీ

ఇక్కడి పరిశ్రమలను తరలిస్తే... ఏపీ, తమిళనాడు సరిహద్దు ప్రాంతాలు డెవలప్ అవుతాయని తమిళనాడు అధికారులకు ఏపీ పరిశ్రమల శాఖ ప్రతిపాదించింది. దీనికి తమిళనాడు సైతం సుముఖంగా ఉన్నట్లు తెలుస్తోంది. విజయపురంలో ఏర్పాటు చేయబోయే ఎంఎస్ఎంఈ పార్కుకు దాదాపు 250 పరిశ్రమలు వస్తాయని భావిస్తున్నారు. వచ్చే నెలలో అంబత్తూరు ఇండస్ట్రీస్ అసోసియేషన్‌తో ఈ మేరకు ఒప్పందం కుదిరే అవకాశం ఉంది. అదే జరిగితే.. భారీగా పెట్టుబడులు రావడంతోపాటు.. వేలాది మందికి ఉపాధి లభిస్తుంది.