కడప: ఆర్టీసీ బస్సెక్కి స్టీరింగ్ పట్టిన యువతి.. భర్త సహకారంతో!

ఆర్టీసీ బస్సెక్కి స్టీరింగ్ పట్టుకుని డ్రైవింగ్ చేస్తోంది యువతి. ఆర్టీసీలో డ్రైవర్ ఉద్యోగం చేసేందుకు సిద్ధమంటోంది. కడప ఆర్టీసీ ఉన్నతాధికారులు భారీ వాహనాలు నడపడంలో శిక్షణ ఇచ్చే కార్యక్రమాన్ని ప్రారంభించారు. కడప ఆర్టీసీ డిపో మేనేజర్‌ కార్యాలయం ఆవరణలో డ్రైవింగ్‌ స్కూల్‌లో శిక్షణ జరుగుతోంది. ఈ ట్రైనింగ్ కోసం చాలామంది దరఖాస్తు చేసుకోగా.. కడపకు చెందిన మాలశ్రీ అనే యువతి కూడా ముందుకు వచ్చారు. ఆమెకు ఇదివరకే లైట్‌ మోటార్‌ వెహికల్‌ డ్రైవింగ్‌ లైసెన్సు ఉండగా.. ఇప్పుడు ఆర్టీసీ ఇచ్చే శిక్షణ కోసం వచ్చారు.

ఆర్టీసీ శిక్షణలో భాగంగా శనివారం కడప రోడ్లపై బస్సు నడిపారు. శిక్షణ పూర్తి చేసుని హెవీ లైసెన్స్‌ పొందిన తర్వాత ఆర్టీసీలో డ్రైవర్‌ ఉద్యోగం చేసే అవకాశం వస్తే తప్పకుండా సద్వినియోగం చేసుకుంటానని మాలశ్రీ అంటున్నారు. తనకు కుటుంబంలో భర్త ప్రోత్సాహం కూడా ఉందని.. బస్సు నడిపేందుకు ధైర్యంగా ముందుకు వచ్చిన యువతిని ఆర్టీసీ ఉన్నతాధికారులు కూడా అభినందిస్తున్నారు. హైదరాబాద్, బెంగళూరు, చెన్నె, ముంబై వంటి నగరాల్లో మహిళలు బస్సు డ్రైవర్లుగా విధులు నిర్వహిస్తున్నారు. ఇప్పుడు తొలిసారిగా కడపలో మాలశ్రీ శిక్షణకు దరఖాస్తు చేసుకోవడం విశేషం.