నెల్లూరు: భార్యాభర్తలు మద్యం తప్పతాగి చిందులు, అంతలోనే షాకింగ్!

సంక్రాంతి పండుగ సంబరాల్లో మునిగిపోయి ఉన్న సమయంలో.. ఓ ఇంట్లో మాత్రం మద్యం రక్కసి విషాదం నింపింది. లోకం తెలియని ముగ్గురు ఆడపిల్లలను అనాథలను చేసింది. ఈ సంఘటన నెల్లూరు జిల్లా చేజర్ల మండలం ఎనమదలలో చోటు చేసుకుంది. స్థానికులు, బాధితులు తెలిపిన వివరాల మేరకు.. ఎనమదలకు చెందిన రోశమ్మకు అనంతసాగరం మండలం శంకరనగరానికి చెందిన పెంచలయ్యతో వివాహమైంది. దంపతులిద్దరూ ఎనమదలలోనే ఓ రైతు ఇంట్లో కూలి పనులు చేసుకొని జీవనం సాగించేవారు. వీరికి మూడేళ్లలోపు వయసున్న ముగ్గురు ఆడపిల్లలు ఉన్నారు.

భోగి పండుగ సందర్భంగా భార్యాభర్తలు ఇద్దరూ ఫూటుగా మద్యం తాగారు. రుచికరమైన భోజనాలు వండుకుని తిన్నారు. ఎప్పటి మాదిరిగానే మద్యం మత్తులో డ్యాన్సులు వేస్తూ.. ఎంజాయ్ చేశారు. అయితే ఏమైందో ఏమో తెలియదుగాని రోశమ్మ మృతి చెందింది. సదరు మహిళ రెండు నెలల బాలింత కావడంతో మద్యం ఎక్కువై మరణించి ఉంటుందని చెబుతున్నారు. అయితే రాత్రికి రాత్రే భార్య మృతదేహాన్ని ఊరిపెద్దల సూచనతో పెంచలయ్య వాగుకు తీసుకెళ్లి పూడ్చిపెట్టేశాడు. మద్యం, కోడికూర ఎక్కువై తన భార్య చనిపోయిందని ఆయన చెప్పాడు. పండగవేళ ఊళ్లో మృతదేహం ఎందుకని వాగులో పాతిపెట్టానని తెలిపాడు. ఇదే విషయాన్ని గ్రామంలో ఉన్న మృతురాలి తల్లిందండ్రులకు, పని చేస్తున్న యజమానికి చెప్పాడు.
దీంతో ముగ్గురు చిన్నారులు ఒంటరిగా మిగిలిపోయారు. అటు తల్లి చనిపోయి.. ఇటు తండ్రి ఎక్కడికో వెళ్లి పోవడంతో ముగ్గురు చిన్నారులు అనాథలుగా మిగిలారు. సాయంత్రం వరకు తమతో ఉన్న అమ్మానాన్నలు ఏమయ్యారో తెలియక చిన్నారులు గుక్కపట్టి ఏడుస్తుంటే ఓదార్చడం ఎవరితరం కాలేదు. వారిలో రెండు నెలల చిన్నారి కూడా ఉండటం స్థానికులను కలచి వేసింది.

కాగా, ముగ్గురు ఆడపిల్లలు ప్రస్తుతం అమ్మమ్మ దగ్గర ఉన్నారు. చిన్నారుల తండ్రి పెంచలయ్య, అతడి సోదరి వచ్చి పిల్లల్ని ఇచ్చేయాలని కోరగా.. అమ్మమ్మ నిరాకరించారు. పిల్లల్ని తామే పెంచుకుంటామని అమ్మమ్మ తేల్చి చెప్పారు. దీంతో పెంచలయ్య అక్కడి నుంచి వెనుదిరిగారు. ఇక, ఈ సంఘటనపై ఎలాంటి ఫిర్యాదు అందలేదని ఎస్సై ఎస్‌కేఎండీ హనీఫ్‌ తెలిపారు.