Tirumala Steps: భార్యను ఎత్తుకొని తిరుమల మెట్లు ఎక్కిన గోదావరి జిల్లావాసి.. వీడియో వైరల్

తిరుమల శ్రీవారి దర్శనానికి వెళ్లే భక్తుల్లో చాలా మంది నడకదారిన వెళ్లడానికి ఇష్టపడతారు. కొందరైతే కాలినడకన ఏడుకొండలు ఎక్కుతామని మొక్కుకుంటారు. నడక మార్గంలో.. ఆ మెట్లన్నీ ఎక్కి తిరుమల కొండపైకి చేరే సరికి ఒళ్లంతా చెమటతో తడిసి ముద్దవుతుంది. శారీరకంగా ఫిట్‌గా ఉన్న వాళ్లు కూడా మెట్లు ఎక్కేసరికి అలసిపోతారు. అలాంటిది ఓ వ్యక్తి తాను మెట్లు ఎక్కడమే కాదు.. తన భార్యను మోస్తూ.. తిరుమల మెట్లు ఎక్కేశాడు.తూర్పుగోదావరి జిల్లా కడియం మండలం కడియపు లంకకు చెందిన లారీ ట్రాన్స్‌పోర్ట్ యజమాని వరదా వీర వెంకట సత్యనారాయణ (సత్తిబాబు), లావణ్య దంపతులు. వీరిద్దరూ ఇటీవల శ్రీవారి దర్శనం కోసం తిరుమల వెళ్లారు. మెట్ల మార్గం ద్వారా వీరు తిరుమల చేరుకుంటుండగా.. సత్తిబాబు వేగంగా మెట్లు ఎక్కడం మొదలుపెట్టారు. అది చూసిన లావణ్య.. మీరు ఎక్కడం కాదు దమ్ముంటే నన్ను ఎత్తుకుని ఎక్కమని సరదాగా ఛాలెంజ్ చేసింది.

సతీమణి సవాల్‌ను సీరియస్ గా తీసుకున్న సత్తిబాబు భార్యను భుజాలపైకి ఎక్కించుకుని మెట్లు ఎక్కడం మొదలు పెట్టారు. ఒకటి కాదు రెండు కాదు ఏకంగా 70 మెట్లు ఎక్కారు. అలా సత్తిబాబు భార్యను మోసుకుంటూ మెట్లు ఎక్కుతుంటే.. మిగతా భక్తులు ఫొటోలు, వీడియోలు తీశారు. తన భార్యను మోస్తూ.. తిరుమల మెట్లు ఎక్కిన వీడియోను సత్తిబాబు ఇన్‌స్టాగ్రామ్‌లో పోస్టు చేశారు. ఆ వీడియో వైరల్‌గా మారింది.
పెళ్లయిన కొత్తలో ఇలాగే ఉంటుందిలే అనుకుంటున్నారా... సత్తిబాబు, లావణ్యలకు పెళ్లయ్యి 24 ఏళ్లు అవుతోదంట. వీరికి ఇద్దరు అమ్మాయిలు కాగా.. వారికి పెళ్లిళ్లు చేశారట. సాఫ్ట్‌వేర్ ఉద్యోగం వస్తే పుట్టింటి, అత్తంటి వారందరనీ తిరుమల తీసుకొస్తానని పెద్ద అల్లుడు గురుదత్త(చందు) వెంకటేశ్వర స్వామిని మొక్కుకున్నారట. ఉద్యోగం రావడంతో బస్సులో నలభై మందిని తిరుపతి తీసుకెళ్లి మొక్కు తీర్చుకున్నారు. ఈ సందర్భంగానే సత్తిబాబు సాహసం చేశారని సమాచారం.