మదనపల్లె దగ్గర ఘోర రోడ్డు ప్రమాదం.. 30మందికి గాయాలు

అన్నమయ్య జిల్లా మదనపల్లె సమీపంలో గురువారం ఉదయం ఘోర రోడ్డు ప్రమాదం జరిగింది. బెంగుళూరు నుంచి మదనపల్లెకు వస్తున్న ఓ ప్రైవేట్ బస్సు మదనపల్లె రూరల్ మండల పరిధిలోని బార్లపల్లె సమీపంలో కూకటిమాని గడ్డ అదుపుతప్పి లోయలో పడిపోయింది. రోడ్డుపై ఓ కారు యూటర్న్ తీసుకుంటుండగా అతివేగంగా వచ్చిన బస్సు అదుపతప్పి లోయలోకి బోల్తా కొట్టింది. డ్రైవర్ ఓవర్ స్పీడ్‌తో నడుపుతుండటంతోనే అదుపు చేయలేక కారును ఢీకొట్టి పడిపోయినట్లు ప్రత్యక్ష సాక్షులు చెబుతున్నారు.మరో పది నిమిషాలలో మదనపల్లెకు బస్సు చేరుకునే సమయంలో ఊహించని విధంగా జరిగిన ఈ ప్రమాదంతో ప్రయాణీకులు షాక్‌కు గురయ్యారు. క్షతగాత్రుల హాహాకారాలతో ఆ ప్రాంతం మార్మోగింది. ఈ ఘటనలో 30 మందికి స్వల్పంగా గాయపడగా.. మరో ఐదుగురికి తీవ్రగాయాలు అయ్యాయి. సమాచారం అందుకున్న పోలీసులు వెంటనే అక్కడికి చేరుకుని సహాయచర్యలు చేపట్టారు. బాధితులను 108 అంబులెన్సుల్లో ఆస్పత్రికి తరలించారు. ఈ ప్రమాదంలో ప్రాణనష్టం జరగకపోవడంతో అందరూ ఊపిరి పీల్చుకున్నారు.
తిరుపతి జిల్లా పుత్తూరు మండలం తడుకులో మరో రోడ్డు ప్రమాదం జరిగింది. తిరువళ్లూరు నుంచి తిరుపతి వెళ్తోన్న ప్రైవేట్ బస్సును.. తిరుత్తణి నుంచి వస్తోన్న ఆర్టీసీ బస్సు వెనుకనుంచి ఢీకొట్టింది. ఈ ప్రమాదంలో డ్రైవర్, కండక్టర్ సహా 30 మంది ప్రయాణికులకు గాయాలయ్యాయి. కండక్టర్‌కు తీవ్ర గాయాలు కాగా.. బస్సులో ఇరుక్కుపోయిన డ్రైవర్‌ను అతి కష్టం మీద బయటకు తీశారు. క్షతగాత్రులకు పుత్తూరు ప్రభుత్వ ఆసుపత్రిలో చికిత్స అందిస్తున్నారు.

• Read Latest Andhra Pradesh News and Telugu News