సొంత నియోజకవర్గానికి చంద్రబాబు.. ఆ కుర్రాడి దూకుడుకు బ్రేకులు వేస్తారా!

టీడీపీ అధినేత చంద్రబాబు సొంత నియోజకవర్గం కుప్పం పర్యటనకు సిద్ధమయ్యారు. బుధవారం నుంచి మూడు రోజుల పాటు నియోజకవర్గంలోనే ఉంటారు. కుప్పం పట్టణంతో పాటు శాంతిపురం, గుడుపల్లె మండలాలలోని పలు గ్రామాల్లో పర్యటించనున్నారు. చంద్రబాబు 11వ మధ్యాహ్నం 2 గంటలకు శాంతిపురం మండలం బెల్లకోకిలకు చేరుకోనున్నారు. అనంతరం బోయనపల్లి గ్రామంలో బాదుడే బాదుడు కార్యక్రమంలో పాల్గొంటారు. 12న సీగలాపల్లిలో జాతరలో చంద్రబాబు పాల్గొంటారు. గుడిపల్లె మండలంలో పోగురుపల్లితో పాటు పలు గ్రామాల్లో చంద్రబాబు పర్యటన కొనసాగనుంది. మూడవ రోజు (13న) కుప్పంలో స్థానిక పార్టీ నేతలు, కార్యకర్తలతో చంద్రబాబు సమావేశంకానున్నారు. పార్టీకి సంబంధించిన కమిటీలు, అనుబంధ విభాగాలపై సమీక్ష చేస్తారు. ఈ నెల 4న శ్రీకాకుళం జిల్లాలో జరిగిన బాదుడే, బాదుడు కార్యక్రమంలో చంద్రబాబు పాల్గొన్నారు. ఆ తర్వాత విశాఖ, కోనసీమ జిల్లాల్లో హాజరయ్యారు. ఇప్పుడు సొంత నియోజకవర్గానికి వెళుతున్నారు.

కుప్పం నియోజకవర్గంలో వైఎస్సార్‌సీపీ దూకుడు పెంచింది. మున్సిపాలిటీతో పాటూ స్థానిక సంస్థల ఎన్నికల్లో కూడా అధికార పార్టీ ఘన విజయం సాధించిన సంగతి తెలిసిందే. అక్కడ ఇంఛార్జ్‌గా ఉన్న కేఆర్‌జీ భరత్‌కు ఎమ్మెల్సీ పదవితో పాటూ చిత్తూరు జిల్లా పార్టీ బాధ్యతల్ని అప్పగించారు. అలాగే భరత్ కూడా నియోజకవర్గంలో గడప, గడపకు వెళ్లేలా ప్లాన్ చేసుకున్నారు. ఈ క్రమంలో చంద్రబాబు పర్యటన ఆసక్తికరంగా మారింది.. టీడీపీ యాక్షన్ ప్లాన్ ఎలా ఉండబోతుందన్నది చూడాలి.