శ్రీవారి ఆర్జిత సేవా టికెట్లు రేపే విడుదల

తిరుమల శ్రీవారి భక్తులకు అలర్ట్. సెప్టెంబర్‌ నెలకు సంబంధించి అర్జిత సేవా టికెట్ల కోటాను టీటీడీ సోమవారం సాయంత్రం 4గంటలకు ఆన్‌లైన్‌లో విడుదల చేయనుంది. కళ్యాణోత్సవం, ఊంజల్‌సేవ, ఆర్జిత బ్రహ్మోత్సవం, సహస్ర దీపాలంకార సేవా టికెట్లను ఫస్ట్ కమ్ ఫస్ట్ సర్వ్ ప్రాతిపదికన భక్తులు ఎప్పటిలాగే నేరుగా బుక్‌ చేసుకోవచ్చు. సుప్రభాతం, అర్చన, తోమాల, అష్టదళపాద పద్మారాధన టికెట్లను ఆన్‌లైన్‌ ఎలక్ట్రానిక్‌ డిప్‌ విధానంలో కేటాయిస్తారు. ఈ సేవలను సోమవారం ఉదయం 10 గంటల నుంచి 29వ తేదీ ఉదయం 10 గంటల వరకు భక్తులు ఆన్‌లైన్‌లో నమోదు చేసుకోవచ్చు.

టికెట్లు పొందిన వారి జాబితాను జూన్‌ 29వ తేదీ మధ్యాహ్నం 12 గంటల తర్వాత వెబ్‌సైట్‌లో పొందుపరుస్తారు. అదేవిధంగా ఎస్ఎంఎస్, ఈ-మెయిల్ ద్వారా తెలియజేస్తారు. టికెట్లు పొందినవారు రెండు రోజుల్లోగా నగదు చెల్లించాల్సి ఉంటుంది. భక్తులు ఈ విషయాన్ని గమనించి ఈ సేవా టికెట్లు బుక్‌ చేసుకోవాలని టీటీడీ సూచించింది.

కళ్యాణోత్సవం ప్రతి రోజు ఉదయం 12 గంటలకు, ఆర్జిత బ్రహ్మోత్సవం ప్రతి రోజూ మధ్యాహ్నం 2 గంటలకు, ఊంజల్ సేవ మధ్యాహ్నం ఒంటి గంటకు, సహస్ర దీపాలాంకరణ సేవ ప్రతిరోజూ సాయంత్రం 5.30 గంటలకు ప్రారంభం అవుతుంది.

శ్రీవారి సుప్రభాత సేవ వేకువజామున 3 గంటలకు ప్రారంభం అవుతుంది. తోమాల సేవ మంగళ, బుధ, గురువారాల్లో తెల్లవారుజామున 3.30 గంటలకు మొదలవుతుంది. అదే రోజుల్లో 4.30 గంటలకు అర్చన ప్రారంభమవుతుంది. ఈ సేవల్లో పాల్గొనాలనుకునే భక్తులు టికెట్లతో అరగంట ముందే రిపోర్ట్ చేయాల్సి ఉంటుంది. అష్టదళ పాద పద్మారాధనం మంగళవారం ఉదయం 5.30 గంటలకు మొదలవుతుంది.

కాగా తిరుమల శ్రీవారి దర్శనం కోసం పెద్ద సంఖ్యలో భక్తులు తరలి వస్తున్నారు. సర్వదర్శనానికి 20 గంటలకు పైగా సమయం పడుతోంది. భక్తుల తాకిడి పెరగడంతో.. గదుల కోసం కూడా నిరీక్షించాల్సి వస్తోంది.