TTD: గ్రహణం.. ఆ 2 రోజులూ శ్రీవారి ఆలయం మూసివేత

సూర్య గ్రహణం, చంద్ర గ్రహణాల కారణంగా తిరుమలలో శ్రీవారి ఆలయాన్ని రెండు రోజులు మూసివేయనున్నట్లు తిరుమల తిరుపతి దేవస్థానం (టీటీడీ) ప్రకటించింది. అక్టోబరు 25న సూర్యగ్రహణం ఉంది. ఈ కారణంగా ఆ రోజు ఉదయం 8.11 గంటల నుంచి రాత్రి 7.30 గంటల వరకు ఆలయాన్ని మూసి వేయనున్నట్లు టీటీడీ ఒక ప్రకటనలో పేర్కొంది. అదేవిధంగా నవంబర్‌ 8న చంద్ర గ్రహణం కారణంగా.. ఉదయం 8.40 గంటల నుంచి రాత్రి 7.20 గంటల వరకు ఆలయాన్ని మూసివేస్తున్నట్లు టీటీడీ వెల్లడించింది. ఈ రెండు రోజుల పాటు వీఐపీ బ్రేక్‌ దర్శనం, శ్రీవాణి ట్రస్టు దర్శనం, ప్రత్యేక ప్రవేశ దర్శనం (రూ. 300 టికెట్) రద్దు చేస్తున్నట్లు పేర్కొంది. దీంతో పాటు ఆర్జిత సేవలైన కళ్యాణోత్సవం, ఊంజల్‌ సేవ, ఆర్జిత బ్రహ్మోత్సవం, సహస్ర దీపాలంకరణ సేవలను కూడా రద్దు చేస్తున్నట్లు టీటీడీ ప్రకటించింది.

ఈ రెండు రోజుల పాటు గ్రహణం వీడిన తర్వాత ఆలయాన్ని శుద్ధి చేస్తామని టీటీడీ వెల్లడించింది. ఆ తర్వాత సర్వదర్శన భక్తులను మాత్రమే శ్రీవారి దర్శనానికి అనుమతించనున్నట్లు తెలిపింది. భక్తులు ఈ విషయాన్ని గమనించి సహకరించాలని టీటీడీ ఒక ప్రకటనలో కోరింది.