తిరుమలకు నడకదారుల్లో వెళ్లే శ్రీవారి భక్తులకు మరో శుభవార్త.. ఇకపై సులభతరంగా ఉండేలా!

తిరుమల శ్రీవారి దర్శనార్థం అలిపిరి, శ్రీవారి మెట్టు మార్గాల ద్వారా నడిచి వెళ్లే భక్తులకు మరో శుభవార్త. ఇకపై లగేజీని మరింత సులభంగా తిరుమలలో అందించేందుకు చర్యలు తీసుకోవాలని టీటీడీ ఈవో ధర్మారెడ్డి అధికారులను ఆదేశించారు. తిరుపతి టీటీడీ పరిపాలన భవనంలోని ఈవో ఛాంబర్ లో లగేజీ యాంత్రికరణ ద్వారా రవాణా, డెలివరీ పై అధికారులతో సమీక్ష నిర్వహించారు.రెండు నడక మార్గాల్లో భక్తులు భద్రపరిచిన లగేజి సామర్థ్యాన్ని పెంచేందుకు యాంత్రికరణను చేస్తూ త్వరితగతిన మరింత సులభంగా అందించాలన్నారు. తిరుమలలో భక్తులు లగేజి తీసుకోవడానికి అవసరమైన డెలివరీ కేంద్రాల సంఖ్య పెంచాలన్నారు. ప్రస్తుతం కంప్యూటర్ అప్లికేషన్ తో ప్రయోగాత్మకంగా పనిచేస్తున్న కేకేసి, సుపథం కేంద్రాల వద్ద రోజువారి లగేజీ డెలివరీల సంఖ్య, భక్తుల నుండి అభిప్రాయ సేకరణ తీసుకోవాలన్నారు.

లగేజి డెలివరీ కేంద్రాల సంఖ్య మరింత పెంచిన తర్వాత అక్కడ అవసరమైన లగేజీ బ్యాగుల నెంబరు, బార్ కోడ్ నెంబరు తదితర అంశాలు కనిపించేలా ఎలక్ట్రానిక్ సమాచార ప్రదర్శన బోర్డులను ఏర్పాటు చేయాలని సంబంధిత అధికారులను ఆదేశించారు. లగేజి డెలివరీ కేంద్రాల్లో అవసరమైనన్ని ట్రాలీలు ఏర్పాటు చేయాలని, సివిల్ పనులు పూర్తి చేయాలని ఇంజనీరింగ్ అధికారులను ఆదేశించారు. అదేవిధంగా కౌంటర్ల నిర్వహణకు అవసరమైన సిబ్బందిని నియమించాలన్నారు.

ఈవో ధర్మారెడ్డి లగేజీ కౌంటర్ల వద్ద డిపాజిట్, రవాణా, డెలివరీ తదితర అంశాలపై ఏర్పాటు చేసిన (పిపిటి) పవర్ పాయింట్ ప్రజెంటేషన్ పరిశీలించి పలు సూచనలు, మార్పులు చేశారు. వచ్చేవారం పూర్తిస్థాయిలో దీనిపై పవర్ పాయింట్ ప్రజెంటేషన్ ఇవ్వాలని అధికారులను ఆయన ఆదేశించారు.

మరోవైపు తాళపత్ర గ్రంథాలు భద్రపరచడానికి అధునాతన సాంకేతిక పరిజ్ఞానంతో నిర్మించనున్న భవన నిర్మాణానికి అధికారులు స్థల పరిశీలన చేశారు. జేఈవో సదా భార్గవి ఆధ్వర్యంలో అధికారుల బృందం వేద విశ్వవిద్యాలయం లో స్థలాన్ని పరిశీలించారు. పరిశోధన భవనం వెనుకవైపున ఉన్న ఖాళీ స్థలం ఈ భవన నిర్మాణానికి అనుకూలంగా ఉంటుందని ప్రాథమికంగా నిర్ణయించారు.

పురావస్తు శాఖ, ఎస్వీ యూనివర్సిటీ వద్ద ఉన్న పురాతన తాళ పత్ర గ్రంథాలను డిజిటైజ్ చేసి భావితరాలకు అందుబాటులో ఉంచాలని టీటీడీ మ్యాన్ స్క్రిప్ట్స్ ప్రాజెక్ట్ నిర్వహిస్తున్న విషయం తెలిసిందే. స్కాన్ చేసిన తాళ పత్రాలను మరో 500 సంవత్సరాలు గడచినా చెక్కు చెదరకుండా ఉండేలా భద్రపరచడానికి టీటీడీ కసరత్తు చేస్తోంది. ఇందులో భాగంగా సనాతన జీవన ట్రస్ట్ ఈ భవన నిర్మాణానికి ముందుకు వచ్చిన విషయం తెలిసిందే. ఈ నేపథ్యం లో అధికారులు స్థల పరిశీలన జరిపారు.

• Read Latest Andhra Pradesh News and Telugu News