తిరుమల: శ్రీవారికి తిరిగి ప్రారంభమైన సుప్రభాత సేవ.. భక్తులకు అనుమతి

ధనుర్మాసం ముగియడంతో తిరుమల శ్రీవారి ఆలయంలో శుక్రవారం నుంచి తిరిగి సుప్రభాత సేవలు ప్రారంభమయ్యాయి. వేకువజామున 3 గంటలకు సుప్రభాత పఠనం సమయంలో భక్తులనూ అనుమతించారు. నేడు శ్రీవారి ఆలయంలో గోదాదేవి పరిణయోత్సవాలు జరగనున్నాయి. కాగా, ధనుర్మాసం నేపథ్యంలో శ్రీవారికి సుప్రభాత సేవలు డిసెంబరు 16 నుంచి నిలిచిపోయిన విషయం తెలిసిందే. ధనుర్మాసంలో సుప్రభాతానికి బదులు శ్రీవారికి తిరుప్పావై పారాయణం చేస్తారు. సహస్రనామార్చనలో తులసికి బదులు బిల్వపత్రాలతో పూజిస్తారు.

జనవరి 14న ధనుర్మాసం పూర్తికావడంతో గోదా కళ్యాణం నిర్వహించారు. ఉదయం శ్రీవారి ఆలయంలో గోదాపరిణయోత్సవం, మధ్యాహ్నం పార్వేటమండపం వద్ద పార్వేట ఉత్సవం జరిగాయి. శ్రీవారి ఆలయంలో నెలరోజుల పాటు జరిగే తిరుప్పావై పారాయణంలో గోదాదేవి రచించిన 30 పాశురాలను అర్చకులు రోజుకొకటి చొప్పున నివేదించారు. ఈ సందర్భంగా భోగశ్రీనివాసమూర్తికి బదులు శ్రీకృష్ణస్వామికి ఏకాంతసేవ నిర్వహించారు.

ధనుర్మాసం నెల రోజులు బ్రహ్మ ముహూర్తంలో పారాయణం చేసిన వారు దైవానుగ్రహాన్ని పొందుతారని శాస్త్రాలు ఘోషిస్తున్నాయి. సాక్షాత్తు భూదేవి అవతారమైన అండాళ్ రచించిన దివ్య ప్రబంధమే తిరుప్పావై. ద్రవిడ భాషలో తిరు అనగా పవిత్రం, పావై అనగా వ్రతం అని అర్థం. వేదాలు, ఉపనిషత్తుల సారమే తిరుప్పావై అని హిందూ పురణాల్లో పేర్కొన్నారు.