Tirumala లో అనూహ్యంగా పెరిగిన రద్దీ.. దర్శనానికి 30 గంటలపైనే, కారణం ఇదే!

Tirumala Devotees Rush: తిరుమలలో అనూహ్యంగా భక్తుల రద్దీ పెరిగింది. బ్రహ్మోత్సవాలు ముగిసిన మరుసటి రోజే పరిస్థితి ఒక్కసారిగా మారిపోయింది. సెలవులు ముగుస్తున్నా సరే భక్తులు కొండపైకి క్యూ కట్టారు. తిరుమల ఒక్కసారిగా కిటకిటలాడింది.. వైకుంఠం క్యూ కాంప్లెక్స్‌, నారాయణగిరి ఉద్యానవనం షెడ్లూ నిండిపోయి. రింగురోడ్డు మీదుగా శిలాతోరణం వరకు.. రెండున్నర కిలోమీటర్ల పొడవునా భక్తులు క్యూ కట్టారు. తిరుమల శ్రీవారి దర్శనానికి 30 గంటలకుపైగా సమయం పడుతోందని.. ర‌ద్దీ స‌మ‌యంలో భ‌క్తులు ఓపిక‌తో ఉండాలని టీటీడీ కోరుతోంది.ముఖ్యంగా తిరుమల శ్రీవారి సర్వదర్శనానికి గురువారం భక్తులు భారీగా తరలివచ్చారు. పెరటాసిమాసం మూడో శనివారంతోపాటు వరుస సెలవులు రావడంతో తమిళనాడునుంచి భక్తుల రద్దీ పెరిగింది. వైకుంఠం క్యూకాంప్లెక్స్‌లోని కంపార్ట్‌మెంట్లు, నారాయణగిరి షెడ్లు నిండిపోయి శిలాతోరణం దాటి క్యూలైన్‌లో భక్తులు వేచి ఉన్నారంటే పరిస్థితి ఎలా ఉందో అర్ధం చేసుకోవచ్చు. అనూహ్యంగా రద్దీ పెరిగడంతో టీటీడీ ఈవో ఏవీ ధర్మారెడ్డి క్యూ లైన్లను పరిశీలించారు. భక్తులు సహకరించాలని ఓపికతో ఉండాలని.. అందరికి అన్న ప్రసాదాలు అందజేస్తామంటున్నారు టీటీడీ అధికారులు.

ఈ రద్దీ పెరగడానికి ప్రధానంగా తమిళులకు పవిత్రమైన పెరటాశి మాసం కారణం అంటున్నారు. సర్వదర్శనానికి బాగా సమయం పడుతోంది. గదుల కోసం నాలుగైదు గంటలు వేచి చూడాల్సిన పరిస్థితి కనిపిస్తోంది. అలాగే కళ్యాణ కట్టలు, లడ్డూ కౌంటర్లు, అఖిలాండం, అన్నప్రసాద భవనం సహా ఎటు చూసినా భక్తులే కనిపిస్తున్నారు. మరోవైపు తిరుమలో భారీ వర్షం కురిసింది. వర్షం కారణంగా భక్తులు తలనీలాలు ఇచ్చే కళ్యాణ కట్టలో వరద నీరు నిలిచిపోయాయి.