విజయవాడలో ‘క్లీనింగ్‌ రోబో’.. ఇక డ్రైనేజీ కష్టాలకు చెక్!

విజయవాడకు క్లీనింగ్ రోబో వచ్చేసింది.. మ్యాన్స్ హోల్స్, అండర్ గ్రౌండ్ డ్రైనేజ్‌ మ్యాన్ హోల్స్‌ను చక, చకా క్లీన్ చేయనుంది. బాండిక్యుట్‌(వి.2.0) రోబో విలువ రూ.39.53 లక్షలు. ఈ క్లీనింగ్‌ రోబోను కార్పొరేట్‌ సోషల్‌ రెస్పాన్సబులిటీ కింద ఓఎన్‌జీసీ ఢిల్లీ.. విజయవాడ నగరపాలక సంస్థకు ఉచితంగా అందజేసింది. ఈ రోబోను కమిషనర్‌ స్వప్నిల్‌ దినకర్‌ పుండ్కర్‌, ఓఎన్‌జీసీ ఎగ్జిక్యూటివ్‌ డైరెక్టర్‌ అమిత్‌ నారాయణ్‌తో కలిసి హనుమాన్‌పేట వెహికల్స్ డిపోలో ప్రారంభించారు. క్లీనింగ్‌ రోబో తాళాన్ని అందజేశారు.

ఈ రోబో ఏ మ్యాన్‌హోల్స్‌నైనా చాలా తేలిగ్గా శుభ్రం చేయగలదు. అండర్ గ్రౌండ్ డ్రెయినేజీ మ్యాన్‌హోల్స్‌లో పేరుకుపోయిన పూడికలను తొలగించడం.. వాటిని శుభ్రం చేయడం ప్రత్యేకత. అలాగే రోబో ‘డ్రోన్‌ యూనిట్‌’కు ప్రత్యేకంగా కెమెరాలను ఏర్పాటు చేశారు.. వీటి సాయంతో ఈ రోబో గొట్టాల్లో మురుగునీటి ప్రవాహాన్ని పూర్తి స్థాయిలో ముందుస్తు అంచనా వేయగలదు. మురుగునీటి ప్రవాహానికి అడ్డుగా ఉన్న వాటిని.. ఇతర ఆటంకాలను కచ్చితంగా గుర్తించగలదు.

ఇలా సాంకేతిక సాయంతో సక్రమంగా నీటికి అడ్డుపడే వాటిని తొలగించేందుకు సాయపడుతుంది. ఇక గొట్టాలు, మ్యాన్‌హోల్స్‌ లోపల రోజులు నిల్వ ఉండే వ్యర్థాలవల్ల వెలువడే విషవాయువుల పరిమాణాలను సకాలంలో గుర్తించగలదు. వీటి ప్రమాదకర స్థితిని అంచనా వేసి.. విధుల్లో ఉన్న కార్మికులు, సిబ్బందిని అప్రమత్తం చేస్తుంది. మొత్తానికి ఈ క్లీనింగ్ రోబో విజయవాడలో చక్కర్లు కొడుతోంది.