Vijayawada: అర్ధరాత్రి వేళ, అంతా నిద్రలోకి జారుకున్నాక.. వీళ్లు ఏం చేశారో చూడండి!

విజయవాడలోకి చెడ్డీ గ్యాంగ్ ఎంటరైందన్న వార్త నగరవాసుల్ని తీవ్రంగా కలవరపెడుతోంది. చెడ్డీ గ్యాంగ్ వచ్చీ రాగానే విజయవాడ సిటీలో హల్ చల్ సృష్టించింది. చిట్టీనగర్‌లోని చెనుమోలు వెంకట్రావు ఫ్లైఓవర్ వద్ద ఉన్న శివదుర్గ అపార్ట్‌మెంట్లోకి ప్రవేశించి డబ్బు, బంగారాన్ని చోరీ చేసింది.

సోమవారం ఉదయం తెల్లవారు జామున 3:15 గంటల సమయంలో ఫ్లాట్ నెంబర్ జి.18లోని మొదటి అంతస్థులో ఈ చోరీ జరిగింది. దొంగతనంపై చిట్టీనగర్‌ పోలీస్ స్టేషన్లో అపార్ట్‌మెంట్ వాసులు ఫిర్యాదు చేశారు. కేసు నమోదు చేసుకుని పోలీసులు దర్యాప్తు చేస్తున్నారు.

కాగా, కొంత కాలం క్రితం విశాఖపట్నం, విజయవాడ, గుంటూరు వంటి నగరాల్లో చెడ్డీ గ్యాంగ్ హల్‌చల్ చేసిన విషయం తెలిసిందే. చెడ్డీలు ధరించి, ముఖాలకు మాస్కులు వేసుకుని.. ఒంటికి ఆముదం పూసుకుని వేకువజామున అంతా గాఢనిద్రలోకి జారుకున్న సమయంలో ఈ ముఠా ఎంటరవుతుంది.

ఏమాత్రం భయపడకుండా నేరుగా ఇళ్లలోకి చొరబడి చోరీలకు పాల్పడతారు. ఎవరైనా అడ్డువస్తే దాడి చేసేందుకు కూడా వెనకాడరు. చెడ్డీ గ్యాంగ్‌పై పోలీసులు అత్యంత నిఘా పెట్టినా సరే.. ఎప్పటికప్పుడు వీళ్ల కదలికలు కనిపిస్తుండటం కలవరపెడుతోంది. పోలీసులు మరింత నిఘా ఏర్పాటు చేసి చెడ్డీ గ్యాంగ్ ఆటకట్టించాలని విజయవాడ నగర వాసులు కోరుతున్నారు.