విజయవాడ: గన్నవరంలో విమాన సర్వీసులకు అంతరాయం

గన్నవరం ఎయిర్ పోర్టులో విమాన సర్వీసులకు తీవ్ర అంతరాయం ఏర్పడింది. గురువారం ఉదయం రావాల్సిన పలు విమాన సర్వీసులకు ఇబ్బందులు ఎదురయ్యాయి. వేకువజాము నుంచే దట్టంగా కురుస్తున్న పొగమంచులో ఎదురుగా ఏముందో కనిపించని పరిస్థితి ఉంది. ఉదయం 7.20 గంటలకు రావాల్సిన ఢిల్లీ, బెంగళూరు సర్వీసులు రెండు గంటలు అలస్యం అయ్యాయి. వాతావరణం అనుకూలించిక పోవడంతో గన్నవరం చేరుకున్న స్పైస్‌ జెట్‌, ఇండిగో విమానాలు దాదాపు అరగంట పాటు గాల్లోనే చక్కర్లు కొట్టాయి.

అటు బుధవారం కూడా మంచు దెబ్బకు కొన్ని విమాన సర్వీసులకు అంతరాయం ఏర్పడింది. గన్నవరం ఎయిర్‌పోర్టుకు రావాల్సిన విమానాలను దారి మళ్లించారు. కొన్ని విమానాలు బెంగళూరుకు పంపించారు. అధికారులు పరిస్థితిని ఎప్పటికప్పుడు సమీక్షిస్తున్నారు. పరిస్థితులన్నీ చక్కబడ్డాక మాత్రమే విమానాలను ఎయిర్‌పోర్టులో ల్యాండ్ చేస్తున్నారు.